Sıyr eti eksportyna kvota engizý ishki naryqtaǵy baǵaǵa qalaı áser etti — Jumanǵarın jaýaby
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın sıyr eti eksportyna engizilgen kvota ishki naryqtaǵy baǵaǵa qalaı áser etkenin aıtty.
— Boljam jasaýmen aınalyspaımyn. Biraq, sıyr eti baǵasynyń turaqtanýyna bul sheshimniń (sıyr eti eksportyna kvota) yqpal etetindigi sózsiz. Ol ákimshilik shara jáne uzaqqa sozylmaıdy. Eń bastysy — kelesi jyl mal sharýashylyǵyn belsendi damytý jyly bolmaq. Biz 2 jyl boıy ósimdik sharýashylyǵyna qarjy quıyp, 2 jyl jaqsy ónim aldyq. Bul baǵytta kredıttik resýrstardy arttyrdyq. Biz dál osyndaı jumysty mal sharýashylyǵy salasynda da júrgizýimiz qajet, — dedi vıtse-premer Úkimet otyrysynan keıingi brıfıngte.
Sonymen qatar ol Úkimet naryqtaǵy et teńgerimin jiti qadaǵalap otyrǵanyn aıtty.
— Biz rekordtyq shekke jetip qaldyq — bıyl shamamen 30 myń tonna eksporttadyq jáne 40 myń tonna eksporttaımyz. Biraq, munyń bári ishki naryqtaǵy baǵaǵa da yqpal etedi. Sondyqtan jeke bordaqylaý alańy men et kombınaty bar kásiporyndar úshin et eksporttaýǵa kvota engizdik. Óıtkeni, eksportqa et kombınattarynan shyǵarylady, — dedi Serik Jumanǵarın.
Aıta keteıik, 3 jeltoqsannan bastap Qazaqstan aýmaǵynan úshinshi elderge jáne EAEO elderine ІQM etin áketýge kvotalar bólý qaǵıdalary kúshine endi.