Sıetldegi gastronomııalyq festıvalde bolǵan atystan úsh adam qaza tapty
ASTANA. KAZINFORM – AQSh-tyń Sıetl qalasynda ótken gastronomııalyq festıval kezinde bolǵan atys saldarynan úsh adam qaza taýyp, taǵy tórt adam jaraqat aldy. Polıtsııa oqıǵaǵa eki adamnyń qatysy bar dep esepteıdi. Olardyń biri ustaldy, ekinshisine izdeý jarııalandy, dep habarlaıdy VVS.
Atys jeksenbi kúni jergilikti ýaqytpen saǵat 18:00 shamasynda (Astana ýaqytymen dúısenbi kúni tańerteń) Sıetldegi «Seattle Center» mádenı-oıyn-saýyq kesheninde jyl saıyn ótetin Bite of Seattle gastronomııalyq festıvali kezinde boldy.
Polıtsııanyń málimetinshe, oqıǵa saldarynan úsh adam kóz jumdy. Olardyń ekeýi oqıǵa ornynda alǵan jaraqatynan qaıtys bolsa, úshinshi adam aýrýhanada jan tapsyrdy.
Sıetl polıtsııasy bastyǵynyń orynbasary Taıron Devıstiń aıtýynsha, jaralanǵan tórt adam «Harborview» medıtsınalyq ortalyǵyna jetkizilgen. Zardap shekkenderdiń arasynda eki jasar bala da bar.
Onyń aıtýynsha, oqıǵa ornyna jaqyn júrgen polıtsııa qyzmetkerleri jedel áreket etip, kúdiktilerdiń birin – jas jigitti ustaǵan. Qazirgi ýaqytta ol tergelip jatyr.
Polıtsııanyń boljamynsha, oqıǵaǵa qatysy bar ekinshi kúdikti oqıǵa ornynan qashyp ketken. Ony izdestirý jumystary jalǵasyp jatyr.
Taıron Devıs polıtsııanyń aldyn ala boljamy boıynsha, festıvalde osy eki adamnyń arasynda atys bolǵanyn málimdedi.
Eske sala ketsek, buǵan deıin AQSh-tyń Arızona shtatynda bolǵan atys saldarynan 10 adam jaraqat alǵany jazyldy.
