Siemens pen Sony shyǵynǵa batty
ASTANA. QazAqparat - 2014 jyldyń birinshi toqsanynda nemistiń Siemens kompanııasynyń taza tabysy 25% qysqardy. Al jyl sońyna deıin kásiporynnyń kirisi taǵy 18%-ǵa azaıdy, dep jazady 24.kz.
Sondaı-aq, kompanııanyń energetıka men gaz bólimshesiniń paıdasy kemidi. Osyǵan oraı, bólim basshysy Roland Fısher óz qyzmetinen ketetinin málimdedi.
Jýyrda Siemens munaı-gaz jabdyqtaryn shyǵaratyn Dresse kompanııasynyń aktsııalaryn satyp aldy. Osylaısha óz jaǵdaıyn odan ári asqyndyryp jiberdi. Óıtkeni aktsııalarǵa ketken qarajat Siemens-tiń jyldyq tabysynan 58 ese kóp boldy.
Japonııanyń Sony kompanııasynyń da jaǵdaıy máz emes. Ótken jyly onyń shyǵyny 1 mlrd 200 mln AQSh dollaryna deıin jetti. Osyǵan oraı, Eýropa, AQSh pen Qytaıdaǵy smartfon shyǵaratyn bólimshesinde bir myń qyzmetker jumysynan aıyrylyp qaldy.
Kompanııa ókilderiniń aıtýynsha, bul sharalar óndiris shyǵynyn azaıtý úshin jasalyp otyr. Al 2016 jyldyń naýryzyna deıin Sony kompanııasy 5 myń qyzmetkerin qysqartpaq.
