Siemag Tecberg kompanııasy Qazaqstan taý-ken ónerkásibin maqsatty naryq retinde tańdady
ASTANA. KAZINFORM — Nemis kompanııasynyń Haıger-Kalteıh qalasyndaǵy keńsesinde Qazaqstan Respýblıkasymen yntymaqtastyqty damytý máselelerine arnalǵan basqarýshy komıtet otyrysy ótti, dep habarlaıdy Kazinform agenttiginiń EO-daǵy tilshisi.
Siemag Tecberg kompanııasynyń ókilderi Qazaqstandy taý-ken ónerkásibiniń iskerlik áleýetine baılanysty maqsatty naryq retinde tańdaǵanyn málimdedi. Siemag Tecberg – shahtalyq kótergish jabdyqtardy ázirleý, óndirý jáne jetkizý salasynda qyzmet etetin halyqaralyq deńgeıdegi kompanııa.
Otyrysta nemis bıznesiniń kelesi baǵyttarda ósý múmkindikteri talqylandy: taý-ken óndirisin jańǵyrtý jáne keńeıtý, ozyq ári tıimdi tehnologııalarǵa suranys, lokalızatsııa, servıstik qyzmetter men uzaq merzimdi seriktestikter, sondaı-aq memlekettik ónerkásiptik ınvestıtsııalyq jobalar.
Qazaqstan tarapynan naryqtyq jáne ınvestıtsııalyq aqparatty Kazakh Invest uıymynyń ókili Saıran Baıjahanov pen Qazaqstan Respýblıkasynyń Bas konsýly Rústem Isabaev usyndy. Bul málimetter nemis tarapyna ishki naryqqa shyǵý, qoldaý sharalary jáne yntymaqtastyq múmkindikteri jóninde praktıkalyq usynystar alýǵa múmkindik berdi.
Sonymen qatar qazaqstandyq tarap nemis ınjener-mehanıkterin eldi tek tranzıttik naryq retinde emes, sondaı-aq óndiris bazasy retinde qarastyrýǵa shaqyrdy. Erkin ekonomıkalyq aımaqtar men ındýstrıaldy parkterde qoljetimdi elektr qýaty, bilikti jumys kúshi jáne jeńildik rejımderiniń bar ekeni atap ótildi.
Qatysýshylar mundaı kezdesýler Germanııa men Qazaqstan arasyndaǵy iskerlik baılanystardy nyǵaıtyp, óndiristik yntymaqtastyqty keńeıtýge septigin tıgizetinin aıtty.
Budan buryn Germanııanyń iri týrızm qaýymdastyǵy Qazaqstanda forým ótkizetinin jazǵanbyz.
