Sıdneıde jaryq shoýy kezinde ondaǵan dron sýǵa qulady
ASTANA. KAZINFORM — Avstralııada Vivid Sydney jaryq shoýy kezinde 90-ǵa jýyq ushqyshsyz ushaq tehnıkalyq aqaýdan keıin Sıdneıdegi Darlıng-Harbor mańynda sýǵa qulady, dep habarlaıdy VBC.
Oqıǵa tanymal Vivid Sydney festıvali kezinde bolǵan. Festıval uıymdastyrýshylary apatqa «kútpegen tehnıkalyq qıyndyqtar» sebep bolǵanyn málimdedi. Osy jaǵdaıdan keıin josparlanǵan birneshe kelesi shoý toqtatyldy.
Drondar shoýyna jaýapty brıtandyq Skymagic kompanııasy qurylǵylar ushyrylǵannan keıin radıojıilik jaǵdaıynyń kútpegen ózgerýi saldarynan aqaý týyndaǵanyn habarlady.
— Keıbir drondar pozıtsııalaý dáldiginiń tómendeýine baılanysty apatty qoný protsedýrasyn iske qosty, — dep málimdedi kompanııa ókilderi.
Uıymdastyrýshylardyń málimetinshe, Kokl-Beı aýdanyndaǵy sýǵa 89 dron qulaǵan. Sonymen qatar, Skymagic apparatardyń belgilengen qaýipsizdik aımaqtarynan shyqpaǵanyn atap ótti.
Kýágerler drondardyń aılaqqa qatty soǵylǵan dybysyn estigen.
— Dybys 10–20 metr qashyqtyqtyń ózinde óte qatty shyqty. Olardyń beton aılaqqa soǵylyp, byt-shyt bolǵany anyq estildi, — dedi port qyzmetkeri.
Oqıǵadan keıin Vivid Sydney uıymdastyrýshylary kelýshilerden qolaısyzdyq úshin keshirim surady. Bılik pen Skymagic mamandary dron shoýyn jalǵastyrý týraly sheshim qabyldamas buryn qosymsha qaýipsizdik tekserisin júrgizedi.
Star-Bound áýe shoýy Vivid Sydney festıvaliniń basty baǵdarlamalarynyń biri bolǵan. Qoıylymǵa bir mezette myńǵa deıin dron qatysyp, shoý uzaqtyǵy 12 mınýtqa deıin jetken.
Vivid Sydney festıvali 2009 jyldan beri ótkizilip keledi. Sondaı-aq Ońtústik jarty shardaǵy eń iri jaryq, mýzyka jáne tsıfrlyq óner festıvalderiniń biri sanalady. Jyl saıyn shara Sydney aılaǵy men Sydney Opera House mańyna myńdaǵan týrıst pen Avstralııa turǵyndaryn jınaıdy.
Beıjiń qalasynda pılotsyz ushý apparattaryn basqarý týraly ereje» 2026 jylǵy 1 mamyrdan bastap kúshine endi.
