Sıdneıde lańkes 40-qa jýyq adamdy kepilge aldy
ASTANA. QazAqparat - Búgin tańerteń qarýlanǵan ıslam atyn jamylǵan lańkes Sıdneı ortalyǵynda Ortalyq bank ǵımaratymen qatar ornalasqan Lindt shokolad fabrıkasynyń dúkeni janyndaǵy dámhanada 40-qa jýyq adamdy kepilge aldy.
Ol Avstralııa premer-mınıstri Tonı Ebbotpen kezdesýdi talap etip, qala boıynsha tórt jarylǵysh zat qoıylǵandyǵyn habarlaǵan.
Lańkes 10 dámhana qyzmetkerin jáne 30 tamaqtanýǵa kelgen adamdy kepilge alǵan. Olardyń bárin qorqynysh pen úreı ústinde ustap otyr, dep habarlady RIA «Novostı».
Polıtsııa shabýyl jasaǵan tek bir terrorıst dep sanaıdy, tártip saqshylary onyń sybaılastary bar-joǵyn anyqtaýda. Avstralııalyq BAQ derekterine súıensek, ol «jankeshti beldigin» taqqan.
Avstralııanyń premer-mınıstri Tonı Ebbot Sıdneıdegi jaǵdaıdy «Tótenshe qaýipti oqıǵa» dep sıpattady.
