Sıdneıde alapat órtten ǵımarattyń qabyrǵasy opyrylyp tústi
SIDNEI. QazAqparat – Búgin Sıdneıdiń ortalyq bóligindegi ǵımarat qyzyl jalynǵa oranyp, qabyrǵasy opyrylyp tústi, dep habarlaıdy QazAqparat ABC.net.au basylymyna silteme jasap.
Órt búgin jergilikti ýaqytpen saǵat 16:00-den keıin Rendl-strıttegi tarıhı muralar tizimine engen ǵımaratta bolǵan. Tilsiz jaýdyń kesirinen kóshedegi qozǵalys toqtap, ǵımarat qabyrǵalary qulady.
Jańa Ońtústik Ýelstiń órt sóndirý-qutqarý qyzmetiniń 100-den astam qyzmetkeri Sarrı-Hıllz aýdanyndaǵy órtti sóndirýge jiberilgen.
Órt saldarynan kópqabatty úıdiń qabyrǵalary da opyrylyp túsken. Órt sóndirýshiler jalyn kórshiles ǵımarattarǵa da taraı ma dep qaýiptenip otyr.
Kýágerlerdiń biri aldymen ǵımarattan tútin shyǵyp jatqanyn kórgenin aıtady. Sodan keıin órtke oranyp, qabyrǵasy qulaǵan. «Aınala ý-shý bolyp jatty. Jer qozǵaldy», - deıdi ol.
Taǵy bir kýágerdiń aıtýynsha, jalynnyń ystyǵy bet shyjǵyratyndaı bolǵan. Jaqyn mańdaǵy shınasy jarylǵan kólikterdiń daýysy estilgen.
«Órttiń aýmaǵy myna aýrýhanamen birdeı boldy», - dedi kýáger áıel kórshi ǵımaratty kórsetip. Aıtýynsha, on mınýttan keıin ǵımarattyń qabyrǵasy opyrylyp túsken.
Bir órt sóndirýshiniń qolyn azdap kúıik shalǵan. Budan ózge órtten zardap shekkender men kóz jumǵandardyń bar-joǵy ázirge belgisiz bolyp otyr.
