Sıdneı aspanyn asa qorqynyshty, túsi ózgeshe bulttar legi jaýlap aldy
ASTANA. QazAqparat - Juma kúni Sıdneı turǵyndary tabıǵattyń qyzyq ta qorqynyshty qubylysyna kýá boldy. Muhıt jaqtan jaǵalaýǵa qaraı týra alyp tolqyndardy elestetetin bulttar tasqyny tutasa tónip kelgen, dep jazady The Mashable basylymy.
Tústen keıin qalaǵa ońtústik jaqtan quddy tsýnamı tárizdi bulttar jóńkile kelip, kún kúrkirep ári naızaǵaı oınap, artynsha qara túnekke aınalǵan. Kórgenderdiń aıtýynsha, osynaý aspandaǵy ózgeshe qubylysty keıbir avstralııalyqtar aqyr zamanǵa balaǵan da kórinedi.
Munyń aldynda meteorologııalyq qyzmet Sıdneıde daýyldy eskertý jarııalamaǵan. Biraq burshaq jaýyp, kúshti jel turatyndyǵy, Sıdneıdiń soltústik jaǵynda ornalasqan aýdandarda daýyl turýy yqtımal ekendigi keıinnen belgili bolǵan.
