Sıtsılııadaǵy bas áýejaı órtke baılanysty jabyldy
ASTANA. QazAqparat - Dúısenbi kúni keshke Katanııa áýejaıynan órt shyqty. Barlyq reıster toqtatyldy, ǵımarat qatty tútinge baılanysty jabyldy, dep habarlaıdy QazAqparat Euronews aqparat agenttigine silteme jasap.
Órt áýejaıdyń tómengi qabatynda jergilikti ýaqyt boıynsha saǵat 23:30 shamasynda bastaldy. Jalyn A termınalyna tez tarady.
Qaza tapqandar men zardap shekkender joq.Ǵımarattaǵy barlyq jolaýshylar men qyzmetkerler evakýatsııalandy.
Tótenshe jaǵdaıdyń sebebi áli anyqtalǵan joq. Tergeý amaldary júrgizilýde.
Áýejaı dırektory Nıko Torrısı keıbir ıtalıandyq BAQ-tyń «búkil ǵımarat órtenip ketti» degen habarlamalaryn joqqa shyǵardy.
Josparlanǵan reısterdiń ushýy kórshi áýejaılardan júzege asyrylady, jolaýshylar avtobýstarmen jetkizilýde. Áýe qatynasy sársenbi kúni tústen keıin qaıta bastalady.
Katanııa áýejaıy - Sıtsılııadaǵy basty áýejaı. Ol kúnine ondaǵan reısterdi qabyldaıdy.
