Sıtsılııa jaǵalaýynan «Atlantıda altyny» tabyldy
ASTANA. QazAqparat - Sıtsılııanyń ońtústik jaǵalaýynda burynǵy Gela grek kolonııasy aýdanynda apatqa ushyraǵan ejelgi kemeniń ornynda jumys jasap jatqan ıtalıandyq teńiz arheologtary eki korınftik shlemdi, ejelgi qumyrany, Massalııalyq qutyny jáne 47 orıhalka quımasyn tapqan.
2014 jyldyń jeltoqsan aıynda arheologtar Atlantıdadaǵy sý túbindegi kemeden 39 metall quımany - Platonnyń sıpattaýynsha, quny altynmen para-par orıhalkany tapqan kezde, bul metall jurtshylyqtyń nazaryn ózine aýdarǵan bolatyn.
«Atlantıda altyny» qalǵan tabylǵan dúnıelerdi kóleńkesinde qaldyryp ketti. Keme jáne ondaǵy júk týraly aqparat óte az: 2600 jyl buryn ejelgi grek qalasy Gelaǵa jaqyn mańdaǵy jaǵalaýda saýda kemesiniń batyp ketkeni ǵana belgili. Bul keme qazirgi tańda 3-5 metr tereńdikte jatyr.
Bul oljalar bizdiń zamanymyzǵa deıingi VII ǵasyrdyń sońy - VI ǵasyrdyń basyna tıesili. Korınfeılik shlem - áskerı tehnıkanyń bir bóligi retinde b.z.d. VI - V ǵasyrlar aralyǵynda taralǵan, alaıda ol Korınfte ǵana jasalmady. Qazirgi tańda ol asa qymbat baǵalanady. Oǵan jaqynda ótken aýktsıondardyń birinde osyndaı shlemniń 174 myń dollarǵa satylǵandyǵy dálel bola alady.
