SIBÝR jáne QAZ IZOL Qazaqstandaǵy jylý oqshaýlaǵysh materıaldar naryǵyn damytý týraly kelisimge keldi
ASTANA. KAZINFORM – SIBÝR jáne Qazaqstannyń jylý oqshaýlaǵysh materıaldaryn óndirýshiler qaýymdastyǵy (QAZ IZOL) sıntetıkalyq jylý oqshaýlaǵysh materıaldardy (JOM) damytý jáne ǵımarattardyń energııa tıimdiligin arttyrý baǵytynda yntymaqtastyq týraly kelisimge qol qoıdy.
Taraptar energııa únemdeý salasyndaǵy bastamalardy ilgeriletýge, normatıvtik-tehnıkalyq retteý men standarttar boıynsha tájirıbe almasýǵa, salalyq talaptardy jetildirýge, sondaı-aq mamandar daıarlaý men ǵylymı-bilim berý uıymdarymen baılanysty damytýǵa nıetti.
Saladaǵy negizgi máselelerdiń biri — eski turǵyn úı qoryndaǵy ǵımarattardyń jylý shyǵynynyń joǵary bolýy. Qabyrǵalar, terezeler jáne túıisý oryndary arqyly jylýdyń 30–40%-ǵa deıingi bóligi joǵalady. QAZ IZOL zamanaýı sıntetıkalyq materıaldardy qoldaný jáne JOM óndirisin jergilikti deńgeıde damytý arqyly 2030 jylǵa qaraı nysandardaǵy energııa tutynýdy 20–30%-ǵa tómendetýdi maqsat etip otyr.
Seriktestik turǵyn úı, áleýmettik, kommertsııalyq jáne ónerkásiptik qurylys salalarynda polımerlik jylý oqshaýlaǵysh materıaldardy keńinen qoldanýǵa baǵyttalǵan. Bul baǵytqa ǵımarattardyń qasbetterin jańǵyrtý, jylý jelilerin, shatyrlardy jáne ınjenerlik ınfraqurylymdy oqshaýlaý, sondaı-aq kómirtek izi tómen jylý oqshaýlaǵysh materıaldardy qoldaný kiredi.
— SIBÝR qurylys materıaldaryn óndirýshilerge ımporttyq ónimderdiń básekege qabiletti balamalaryn shyǵarýǵa arnalǵan tehnologııalyq sheshimderdi usynady. Biz retseptýralardy ázirleýden bastap daıyn sheshimderdi naryqqa ilgeriletýge deıingi tolyq tsıkldi qalyptastyramyz. QAZ IZOL-men birlesken jumys Qazaqstandaǵy zamanaýı JOM naryǵynyń damýyn jedeldetip, jergilikti óndirýshilerdi qoldaıtynyna senimdimiz, — dedi SIBÝRdyń «Qurylys» dıvızıonynyń dırektory Alekseı Sboev.
QAZ IZOL qaýymdastyǵynyń prezıdenti Erjan Rahımov bylaı dep atap ótti.
— SIBÝR-men yntymaqtastyq — Qazaqstan men Reseı naryǵyna qatysýshylar arasyndaǵy kásibı ózara is-qımyldy damytýdaǵy mańyzdy kezeń. Saraptamalyq bilim men praktıkalyq tájirıbeni biriktirý energııa tıimdiligin arttyrýǵa, normatıvtik retteýdi jetildirýge jáne zamanaýı tehnologııalardy engizýge múmkindik beredi, — dedi ol.
Bul seriktestik Reseıdiń polımerlik jylý oqshaýlaý salasyndaǵy tájirıbesin Qazaqstan naryǵynyń mindetterimen biriktirip, turǵyn úı qoryn jańǵyrtýǵa, energııa shyǵyndaryn azaıtýǵa jáne otandyq óndirýshilerdiń básekege qabilettiligin arttyrýǵa baǵyttalǵan.
