Sibirdegi órt Qazaqstan úshin qaýipti me
NUR-SULTAN. QazAqparat –QR ІІM Tótenshe jaǵdaılar komıtetiniń tóraǵasy Vladımır Bekker Reseıdiń Sibir aýmaǵyndaǵy órttiń taralýy Qazaqstanǵa qaýip týdyrmaıtynyn málim etti, dep habarlaıdy QazAqparat tilshisi.
«Bul órt bizge qater týdyrmaıdy. Tótenshe jaǵdaılardyń úılestirýshisi retinde barlyq órtke qatysty máseleni baqylaýda ustaýǵa jáne der kezinde kómek kórsetýge tyrysamyz», - dedi V. Bekker.
Onyń paıymynsha, el aýmaǵy úlken bolǵandyqtan tilsiz jaýmen kúres reseılik qutqarýshylar úshin qıynǵa soǵyp tur.
«Biz órtti bastapqy kezeńde óshirýge bar kúsh-jigerimizdi salyp kelemiz. Ókinishke qaraı, Reseıde tabıǵı órtter problemasy bar. Óıtkeni bul eldiń aýmaǵy óte úlken. Sonymen qatar, bizdegi sııaqty RF-te eldi mekender araqashyqtyǵy tym alshaq. Reseılikter órt oshaqtary anyqtalǵan jaǵdaıda bizge habar beredi. Bul sharalar órtke ýaqytyly áreket etý úshin jasalady», - dedi ol.
Eske sala ketsek, buǵan deıin elordany basqan tútin Reseıdegi orman órtterinen kelip jatqanyn habarlaǵan bolatynbyz.
25 shildedegi málimet boıynsha, Reseıdiń Krasnoıar ólkesi men Irkýtsk oblysynda órtke oranǵan orman alqabynyń aýmaǵy mıllıon gektardy qurady.
Búgin Nur-Sultan qalalyq Taýarlar men qyzmetterdiń sapasyn jáne qaýipsizdigin baqylaý departamentiniń basshysy Sádýaqas Baıǵabylov Sibirdegi orman órtiniń tútini elordaǵa qaıta keletinin, biraq oǵan alańdaýǵa esh negiz joqtyǵyn málim etken bolatyn.
