Sibir jarasynan kómilgen maldyń 700-den astam orny belgisiz kúıde qalyp otyr

ASTANA. QazAqparat - Qazaqstanda sibir jarasynan shyǵyn bolǵan maldyń kómilgen 3 298 oryn bar. Bul týraly búgin «QazAqparat» tilshisine bergen resmı jaýabynda QR Aýyl sharýashylyǵy mınıstrligi málim etti.

 «QR aýmaǵynda sibir jarasy bar 2604 sanıtarlyq aýmaq bar. Olardyń ishinde 2016 jyldyń 15 shildesindegi jaǵdaı boıynsha, 1890 qorymnyń naqty oryndary anyqtaldy. Sáıkesinshe, 714 qorym áli tabylǵan joq. Bul shamamen 27,4%», - delingen «QazAqparat» tilshisine berilgen jaýapta.

Mal kómilgen jerlerdiń 702-si (37,1%) qorshalmaǵan nemese onda arnaıy eskertý belgileri ornatylmaǵan.

1232 jer týraly aqparat avtomattandyrylǵan aqparattyq jer kadastry memlekettik júıesine engizilgen.

Jalpy el aýmaǵynda, mal kómilgen 3 298 bıotermıkalyq qorym bar.

Buǵan deıin habarlaǵanymyzdaı, 2016 jyldyń 8 maýsymy men 8 shildesi aralyǵynda Qazaqstan boıynsha 16 adam túıneme juqtyrǵan. Almaty oblysynda - úsh adam, Shyǵys Qazaqstan oblysynda - eki adam, Qaraǵandy oblysynda segiz adam, Pavlodar oblysynda úsh adam osy aýrýmen aýyrǵan. Ókinishke qaraı, Qaraǵandy oblysynda eki, Pavlodar oblysynda bir adam qaıtys boldy. Aman qalǵan on tórt adamnyń segizi qazir aýrýhanadan shyqqan, taǵy alty adam statsıonarda em qabyldaýda.

Mınıstrliktiń málim etkenindeı, 2016 jyly kóktem basynda barlyq óńirlerde sibir jarasyna qarsy vaktsına egý 100 paıyz atqarylǵan kórinedi.

«Vaktsınalar elge jetkizilgen kezde, ony ekpes buryn Ulttyq referenttik ortalyǵy onyń sapasyn jiti tekserýden ótkizedi. Vaktsına jetkizýsheleri onyń pasporty men sapa sertıfıkatyn usynady», - delingen habarlamada.

Zertteý nátıjesi kórsetkenindeı, atalmysh vaktsına barlyq talaptarǵa saı bolyp shyqty. Sonymen qatar vaktsınalardyń sapasyn anyqtaý maqsatynda onyń úlgileri RF jáne Eýropaǵa joldandy.