«Sibir jarasyn juqtyrǵan mal eti satylýda»: Mınıstrlik aqparatqa túsinik berdi

ASTANA. QazAqparat – Aýyl sharýashylyǵy mınıstrligi sibir jarasyn juqtyrǵan mal eti satylyp jatqany týraly aqparatqa túsinik berdi, dep habarlaıdy QazAqparat.

Qazaqstanda saýda sórelerine sibir jarasyn juqtyrǵan maldyń eti túskeni týraly áleýmettik jelide tarap jatqan aqparat shyndyqqa janaspaıdy. Aqmola oblysynyń Qosshy qalasynda sibir jarasy oshaqtarynyń bolýy týraly habarlama da – jalǵan

, - dep málim etti mınıstrlikten.

Buǵan deıin habarlaǵanymyzdaı, Aqmola oblysy Jarqaıyń aýdany, Úshqarasý aýylynyń 12 turǵynynda túınemeniń (sibir jarasy) teridegi túri tirkelgen bolatyn. Barlyq naýqas medıtsına qyzmetkerleriniń baqylaýyna alyndy, klınıkalyq hattamaǵa sáıkes em qabyldap jatyr. Al aýyldan aýylsharýashylyq ónimderin shyǵarýǵa tyıym salý maqsatynda joldarǵa beketter qoıyldy. Karantın jarııalandy.«Úshqarasý» JShS mal sharýashylyǵy kásipornynyń dırektorynan maldyń qyrylǵany týraly habarlama 28 tamyzda túsken. Et jedel túrde tárkilenip, ólgen mal joıyldy.

Qazir Jarqaıyń aýdanynda SEQ, densaýlyq saqtaý, veterınarııalyq baqylaý jáne qadaǵalaý komıtetiniń aýmaqtyq ınspektsııasy, sondaı-aq veterınarııa basqarmasy qyzmetkerlerinen turatyn jumys toby júr. Barlyq tekserilgen oshaqtarda dezınfektsııa júrgizildi, ári qaraı zertteý úshin topyraq pen jerasty sýlarynyń synamalary alyndy.Aýylǵa 1,7 myńnan astam doza vaktsına jáne 900 myń ml dezınfektsııa quraldary, sondaı-aq oshaqty tekserý jáne joıý úshin qajetti barlyq arnaıy tehnıka jetkizildi. Jergilikti jerde «Respýblıkalyq epızootııaǵa qarsy jasaq» RMM-niń 9 mamany jumys istep jatyr.Zalaldy baǵalaý jáne aýrýdan ólgen mal úshin ótemaqy tóleý jónindegi arnaıy komıssııa quryldy. Memlekettik organdar jaǵdaıdy baqylaýda ustap otyr

, - delingen mınıstrlik habarlamasynda.