Sibir jarasy boıynsha anyqtalmaǵan mal qorymdary izdestirilip jatyr
«Sibir jarasy máselesi erekshe baqylaýda tur. Búginde atalǵan indetke qarsy veterınarlyq preparattardyń respýblıkalyq qory jetkilikti kólemde jınaqtaldy. Sonymen qatar túıneme aýrýy boıynsha mal qorymdaryn qorshaý men olarǵa tıisti belgilerdi ornatý sharalary maqsatty jumystar júrgizilip jatyr»,-dedi Qabdoldanov baspasóz máslıhatynda.
Onyń sózine qaraǵanda, Qazaqstan aýmaǵynda 2 608 mal qorymy bar, onyń ishinde 2 248-iniń orny belgili. Qazirgi kezde anyqtalmaǵan mal qorymdary boıynsha izdestirý sharalary jalǵasýda.
Atap aıtqanda, bıylǵy jaz aılarynda Qazaqstanda sibir jarasy boıynsha keıbir qaýipti pýnktter qorshalmaǵany jáne olarda arnaıy eskertý belgileri de joq ekendigi aıtylǵan bolatyn. Osy rette jergilikti ákimdikterge mundaı qorymdarynyń jaı-kúıin tıisti deńgeıde ustap turý baǵytyndaǵy jumystardy júrgizý tapsyryldy.
Eske sala keteıik, ótken jyly maýsym aıynyń aıaǵyna taman Qaraǵandy oblysy Shet aýdany Erkindik aýylynda sibir jarasy paıda bolyp, aýylda karantın jarııalanǵan bolatyn. Aýrý juqtyrdy degen kúdikpen 11 adam aýrýhanaǵa jatqyzylyp, olardyń ekeýi qaza tapqan edi.
Sonymen qatar byltyr Pavlodar oblysy Ertis aýdany, Uzynsý aýylynda soıylǵan sıyrdyń etinen sibir jarasynyń batsıllalary tabyldy. Maldy soıý kezinde bolǵan úsh turǵyn 8 shilde kúni sibir jarasy kúdigimen juqpaly aýrýlar aýrýhanasyna jetkizilgen. Atalǵan dıagnoz 11 shildede rastaldy.