Sibir jarasy boıynsha 700-den astam qaýipti pýnkt qorshalmaǵan, arnaıy belgileri de joq - AShM

ASTANA. QazAqparat - Qazaqstanda sibir jarasy boıynsha 700-den astam qaýipti pýkt qorshalmaǵan, arnaıy eskertý belgileri de joq. Búgin Úkimettiń selektorlyq rejimdegi otyrysynda elimizdiń Aýyl sharýashylyǵy vıtse-mınıstri Gúlmıra Isaeva osylaı dep málimdedi.

«Respýblıkada sibir jarasy boıynsha statsıonarlyq qolaısyz pýnktter  kadastryna sáıkes 2604 pýnkt bar. Onyń 1890-ynyń naqty orny belgilengen. Orny belgilenbegen 714 pýnkt bar. Negizinen olar sibir jarasy boıynsha 50-70 jyl burynǵy pýnktter. Biz olardyń qandaı aýyldy okrýgte ornalasqanyn bilemiz. Olarda jyl saıyn topyraqtan sibir jarasyna zertteý júrgiziledi. Bul eldi mekenderde sibir jarasyna shaldyǵýdyń jańa derekteri anyqtalǵan emes», - dedi ol.

Sonymen qatar vıtse-mınıstr ótken jyly Qazaq veterınarııa ǵylymı-zertteý ınstıtýty 601 ret zertteýge shyǵyp, sonyń nátıjesinde 32 pýnkttiń naqty ornyn anyqtaǵanyn eske saldy.

«Eger naqty orny anyqtalǵan 1890 pýnkttiń jaı-kúıine toqtalar bolsaq, onyń 702-siniń qorshaýy nemese aıyrym belgisi joq. Máselen, mundaı pýnktter Pavlodar oblysynda - 86, Batys Qazaqstan oblysynda - 84», - dedi G.Isaeva.

Osy rette ol jergilikti ákimdikter mundaı qorymdardyń jaı-kúıin tıisti deńgeıde ustap turý baǵytyndaǵy jumystardy júrgizýge mindetti ekendigin eske saldy. Bul maqsattarǵa 1,6 mlrd. teńge qajet.