Sibir taýtekesin atqan brakonerler ustaldy

TALDYQORǴAN. QazAqparat - 2-tamyz kúni keshki saǵat 19:30 shamasynda Jońǵar-Alataý parkiniń memlekettik ınspektorlary kezekti reıd barysynda Toqty memlekettik tabıǵı qaýmaly aýmaǵynan Toyota Land Cruiser Prado markaly avtokólikti toqtatty, dep habarlaıdy QazAqparat.

Orman sharýashylyǵy jáne janýarlar dúnıesi komıtetiniń málimetinshe, kólik ishinde bolǵan Qazaqstan azamaty men ıspan ultynyń eki ókili ustaldy.

«Kólikti tintý barysynda júk salý bóliginen 2 dana Sibir taýtekeleriniń bastary terisimen jáne eki qapqa salynǵan salmaǵy 60-62 kg etteri, sondaı-aq shet el azamattaryna tıesili eki qarý - Mannlicher, Bleızer tárkilendi», - dep jazdy vedomstvodan.

Atalǵan fakti boıynsha is tergep-tekserý amaldaryn júrgizý úshin Jetisý oblysy Alakól aýdandyq polıtsııa bólimine jiberildi.