Sybaılas jemqorlyqtan tárkilengen aqshaǵa 89 mektep salynyp jatyr

ASTANA. KAZINFORM – Memleket basshysynyń tapsyrmasy boıynsha sybaılas jemqorlardan tárkilengen barlyq qarjy áleýmettik qajettilikterge baǵyttalýda. Bul týraly Sybaılas jemqorlyqqa qarsy qyzmettiń resmı ókili Danııar Bıgaıdarov aıtty.

«Bilim berý ınfraqurylymyn qoldaý qory» arqyly qaıtarylǵan 153,3 mlrd teńgeden 89 mekteptiń qurylysyna qarjy bólindi. Nátıjesinde elimizdiń túrli óńirleri men iri qalalarynda 100 myńǵa jýyq oqýshy orny jasaqtaldy.

− Osy 89 mekteptiń 61-i salynyp, paıdalanýǵa berildi, onyń 29-y aýyldyq jerlerde ornalasqan. Bul shara 6 úsh aýysymdy, 2 apatty jáne 1 tozyǵy jetken mekteptiń máselesin sheshýge múmkindik berdi, − dedi D. Bıgaıdarov Sybaılas jemqorlyqqa qarsy qyzmette ótken brıfıngte.

Ótken jyly 25 jańa mektep salyndy, olardyń basym bóligi Astana qalasynda, sondaı-aq Mańǵystaý, Almaty jáne Jambyl oblystarynda ornalasqan. Bıyl 22 myń oqýshyǵa arnalǵan taǵy 28 mekteptiń qurylysyn júrgizý josparlanǵan. Barlyq bilim berý uıymdary zamanaýı jabdyqtarmen qamtamasyz etilip, oqýshylar úshin qolaıly jaǵdaı jasalǵan.

Sonymen birge, «Arnaýly memlekettik qor» arqyly da áleýmettik nysandar qurylysy qarjylandyrylǵan. Bul qor memleket menshigine qaıtarylǵan múlikti satýdan túsken qarajat esebinen jáne sybaılas jemqorlyqqa qarsy qyzmet kúshteri arqyly tolyqtyrylady.

Qarajattyń bir bóligi aýyldyq jerlerdegi 7 mektepti (Atyraý, Túrkistan oblystarynda, Jetisý jáne Ulytaý oblystarynda), 2 sport keshenin (Aqmola jáne Almaty oblystarynda), 1 jataqhanany (Shymkent qalasynda) jáne 2 balabaqshany (Aqtóbe jáne Petropavl qalalarynda) qosa alǵanda, 12 nysan salýǵa baǵyttaldy.

Sonymen qatar, elordada Arnaıy memlekettik qor qarajatyna Q. Munaıtpasov atyndaǵy 3598 oryndyq jańa stadıon salynady.

Sondaı-aq densaýlyq saqtaý salasyndaǵy 105 nysan (Rıdder qalasyndaǵy kópfýnktsıonaldy aýrýhana kesheni, jedel járdem stantsııalary, medıtsınalyq pýnktter, dárigerlik ambýlatorııalar, zerthanalar), 162 sýmen jabdyqtaý júıeleri (sý qubyry jáne taratý jelileri, sý tartý jáne qysym-retteý qurylystary) maquldandy.

Arnaıy memlekettik qordan elimizdiń túrli óńirlerinde 223,9 mlrd teńgege 280-ge jýyq áleýmettik mańyzy bar nysandardy ınvestıtsııalaýǵa qoldaý kórsetilgen.

Aıt keteıik, 2022 jyldan beri memleketke jáne kvazımemlekettik sektor sýbektilerine 1 trıllıon 130 mıllıard teńgeden astam aktıv qaıtaryldy. Aktıvterdiń edáýir bóligi – 670 mıllıon AQSh dollary shetelden qaıtqan.

Sonymen birge, Astana bankiniń burynǵy aktsıoneri Oljas Toqtarovqa syrttaı sot úkimi shyqty.