Sybaılas jemqorlyqpen kúresý memlekettik saıasattyń basym baǵyty bolyp qala beredi – Prezıdent
ASTANA. KAZINFORM – Sybaılas jemqorlyqpen barlyq deńgeıde kúresý memlekettik saıasattyń basym baǵyty bolyp qala beredi. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
- Mundaı pikirlerden habarym bar. Onyń bárin durys túsinbeýshilik nemese keıbir «aram oıly» adamdardyń bos áńgimesi dep sanaımyn. Sybaılas jemqorlyqqa qarsy is-qımyl agenttigi derbes memlekettik organ retinde ózine júktelgen mindetti tabysty oryndady. Oǵan kiná arta almaımyz. Ulttyq qaýipsizdik komıteti de jemqorlyqpen kúresedi. Eki mekemeniń bir mindetti qabattasa atqarýy memlekettik mańyzy bar jumysqa kesirin tıgize bastady, - dedi Qasym-Jomart Toqaev.
Memleket basshysynyń aıtýynsha, sybaılas jemqorlyqpen barlyq deńgeıde kúresý memlekettik saıasattyń basym baǵyty bolyp qala beredi. Buǵan qatysty eshqandaı kúmán týmaýǵa tıis.
- Qabyldanǵan sheshim qatardaǵy jemqorlardy ǵana emes, qylmystyq árekettiń ıdeologtary men uıymdastyrýshylaryn da jaýapqa tartýǵa múmkindik beredi. Sonymen qatar, qylmystyń aldyn alý úshin túsindirý jáne aǵartý jumystaryna ádettegideı aıryqsha nazar aýdarylady. Qazir bul – Memlekettik qyzmet isteri agenttiginiń quzyryndaǵy mindet, - dedi Qasym-Jomart Toqaev.
Prezıdenttiń paıymynsha, jemqorlyqtan aýlaq bolý qajettigin balalardyń qulaǵyna jastaıynan quıa bergen jón. Bul jerde mektepter, qoǵamdyq uıymdar, belsendi azamattar, ásirese, ata-analar sheshýshi ról atqarýǵa tıis. Sol kezde elimizde jeń ushynan jalǵasqan jemqorlyqqa múldem tózbeý mádenıeti qalyptasady.
- Ulttyq qaýipsizdik komıteti sanmen áýestenbeı, sapaǵa mán berip, jemqorlyqqa qarsy naqty jumys júrgizedi. Sonda memlekettik qyzmetshiler quqyq qorǵaý qyzmetkerlerine jaltaqtamaı, batyl sheshim qabyldaıtyn bolady, - dedi Memleket basshysy.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.