Sybaılas jemqorlyqpen kúres: SQO-da eki eks-sýdıa, zańger men kásipkerlerge sot úkimi shyqty

PETROPAVL. KAZINFORM – Petropavlda burynǵy sýdıalar, zańger jáne kásipkerler – bes adamǵa qatysty qylmystyq is qaralyp, sottalǵandarǵa 8 jyldan 3,5 jylǵa deıin jaza kesildi.

Іsti Petropavl qalalyq soty qarady.

Tergeý málimetinshe, aıyptalýshylar sot sheshimderine yqpal etý úshin para berý jáne alý faktilerine baılanysty jáne alaıaqtyq boıynsha kúdikke ilingen. Epızodtardyń birinde sýdıaǵa qajetti sheshim shyǵarý úshin 15 myń dollar berilgen. Sondaı-aq jol jóndeý kompanııasyna qatysty sot sheshimine yqpal etý úshin 2,5 mln teńge kóleminde aqsha berilgeni aıtyldy.

Sot úkimimen Soltústik Qazaqstan oblysy mamandandyrylǵan aýdanaralyq ekonomıkalyq sotynyń tóraǵasy bolǵan Bekbol Baımahanovke 8 jyl merzimge bas bostandyǵynan aıyrý jazasyn taǵaıyndaldy. Sonymen qatar ol ómir boıyna memlekettik qyzmette, sýdıa laýazymynda jáne kvazımemlekettik sektor uıymdarynda qyzmet atqarý quqyǵynan aıyryldy. Jazany ortasha qaýipsizdik mekemesinde óteıdi. Budan bólek, sot sheshimimen odan memleket paıdasyna 1 284 000 teńge tárkilenedi.

Sondaı-aq Petropavl qalasy №2 sotynyń tóraǵasy bolǵan Erlan Ibraev 6 jylǵa bas bostandyǵynan aıyryldy. Ol da ómir boıyna memlekettik qyzmet pen sýdıa laýazymdaryn atqarý quqyǵynan aıyryldy. Sot úkimimen odan 2 250 000 teńge memleket paıdasyna tárkilenedi.

Іs boıynsha taǵy bir aıyptalýshy - Almaty qalasynyń zańgeri Artem Ivanov asa iri mólsherde para berýge oqtalý faktisi boıynsha kináli dep tanyldy. Sot oǵan 6 jyl merzimge bas bostandyǵynan aıyrý jazasyn taǵaıyndap, memlekettik qyzmette jáne kvazımemlekettik sektorda qyzmet atqarý quqyǵynan ómir boıyna aıyrdy.

Sonymen qatar sot Gamlet Melkonıandy jáne Gevorg Pogosıandy birneshe ret para berýge oqtalý faktileri boıynsha kináli dep tanydy. Melkonıanǵa 4 jylǵa bas bostandyǵynan aıyrý jazasy, al Pogosıanǵa 3 jyl 6 aı merzimge bas bostandyǵynan aıyrý jazasy taǵaıyndaldy. Ekeýi de ómir boıyna memlekettik qyzmette jumys isteý quqyǵynan aıyryldy.

Sot úkimi boıynsha barlyq sottalǵandar jazasyn qylmystyq-atqarý júıesiniń ortasha qaýipsizdik mekemelerinde óteıdi.

Osy qylmystyq iske qatysty sot sýdıa Omarovqa da jeke qaýly shyǵardy. Materıaldar protsessýaldyq sheshim qabyldaý úshin Bas prokýratýraǵa joldandy. Ol Baımahanov pen Ivanovty tanystyryp,kezdesýdi uıymdastyrǵan. Biraq keıin qylmys týraly tıisti vedomstvoǵa habarlaǵan.

Esterińizge salaıyq, 2024 jyldyń jeltoqsan aıynda SQO mamandandyrylǵan aýdanaralyq ekonomıkalyq sotynyń tóraǵasy Bekbol Baımahanov 15 myń AQSh dollary somasynda para alý kezinde ustalǵan edi.