Sybaılas jemqorlyqpen kúres: Almaty oblysynda aýdan ákimi jaýapqa tartyldy

  Almaty oblysy Qarasaı aýdanynyń ákimi sybaılas jemqorlyqqa qarsy zańnamany buzǵany úshin jaýapqa tartyldy, dep habarlaıdy Kazinform.

Sybaılas jemqorlyqpen kúres qyzmetiniń málimetinshe, monıtorıng barysynda aýdan ákimi aktıvter men mindettemeler týraly deklaratsııalardy usynbaǵan úmitkerdi kásipkerlik bólimi basshysynyń mindetin ýaqytsha atqarý laýazymyna taǵaıyndaǵany anyqtaldy.

«Bólim basshysy memlekettik fýnktsııalardy oryndaýǵa ýákiletti tulǵa. Sondyqtan bul QR ÁQBtK-niń 680-babynda kózdelgen talaptardy buzý bolyp tabylady (memlekettik organdar basshylarynyń sybaılas jemqorlyqqa qarsy is-qımyl jónindegi sharalardy qabyldamaýy). Atalǵan tulǵaǵa qatysty ákimshilik hattama toltyryldy. Іsti qaraý barysynda ákim kinásin tolyq moıyndady»,- dep habarlady QR Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń baspasóz qyzmeti.

Aýdan ákimine 50 AEK, ıaǵnı 172 500 teńge aıyppul salyndy.