Sybaılas jemqorlyqqa qatysty eshnárseni jasyrmaı, halyqqa ashyq kórsetemiz - Prezıdent
ASTANA. KAZINFORM – Memleket basshysy Qasym-Jomart Toqaev Qazaqstandaǵy sybaılas jemqorlyq ahýaly kúrdeli ekenin aıtyp, jemqorlyqqa qarsy qabyldanyp jatqan sharalar týraly aqparat qoǵamǵa ashyq usynylatynyn málimdedi, dep habarlady Aqorda.
Prezıdenttiń aıtýynsha, sońǵy úsh jylda sybaılas jemqorlyqqa qatysty myńdaǵan quqyq buzýshylyq anyqtalǵan.
- Tek sońǵy úsh jyldyń ishinde, ıaǵnı 2023 jáne 2025 jyldar aralyǵynda 3 168 sybaılas jemqorlyq boıynsha quqyq buzýshylyq anyqtaldy, sonyń ishinde 2 165 quqyq buzýshylyqty memlekettik qyzmetshiler jasaǵan, al qalǵanyn basqa da tulǵalar, atap aıtqanda, kvazımemlekettik sektor qyzmetshileri jasaǵan. Jalpy somasy – 248,2 mıllıard dollardan asady.
Osy jyldyń on aıy ishinde 751 sybaılas jemqorlyqqa qatysty quqyqbuzýshylyq jasalǵan, sonyń 546-syn – memlekettik qyzmetshiler, al 205-in ózge de tulǵalar jasaǵan, sonyń ishinde kvazımemlekettik sektor qyzmetshileri de bar.
Osy statıstıkadan kórip otyrǵanymyzdaı, elimizdegi sybaılas jemqorlyq ahýaly kúrdeli bolyp tur. Biraq biz eshnárseni de jasyrmaımyz, basyn qumǵa tyqqan straýstyń keıpine túspeımiz. Biz osy saladaǵy máseleniń bárin ashyq aıtamyz, jemqorlyqty joıý úshin qabyldanǵan jáne qabyldanatyn sharalar týraly da eshnárseni jasyrmaı, barlyǵyn halyqqa ashyq kórsetip otyramyz, – dedi Qasym-Jomart Toqaev.
Sol sebepti túrli deńgeıdegi basshylardyń jymqyrýǵa qatysty quqyq buzýshylyqtaryn Ulttyq qaýipsizdik komıtetiniń Sybaılas jemqorlyqqa qarsy is-qımyl jónindegi qyzmeti Bas prokýratýramen birge jedel jáne jiti tekseredi.
- «Ózimizdiki» jáne «Ózimizdiki emes», tipti «bóten» dep bólýge múlde jol berilmeıdi. Óıtkeni Konstıtýtsııada zań men sot aldynda bári teń ekeni anyq jazyldy. Biz bárimiz de osy zańǵa baǵynýymyz kerek, - dedi Memleket basshysy.
Aıta keteıik, buǵan deıin 13 qarashada Memleket basshysy Qasym-Jomart Toqaevtyń tóraǵalyǵymen Qaýipsizdik Keńesiniń kólik-logıstıka salasyn damytý máseleleri boıynsha shuǵyl otyrysy ótetini habarlanǵan bolatyn.