«Sybaılas jemqorlyqqa qarsy volonterlik» jobasy 7 mlrd teńgeniń negizsiz jumsalýynyń aldyn aldy

ASTANA. KAZINFORM — «Sybaılas jemqorlyqqa qarsy volonterlik» jobasyna múshe eriktiler 7 mlrd teńgeden astam qarajattyń negizsiz jumsalýynyń aldyn aldy. Bul týraly Sybaılas jemqorlyqqa qarsy  is-qımyl Agenttiginiń baspasóz qyzmeti málim etti.  

Ótken jyldyń tamyz aıynda iske qosylǵan «Sybaılas jemqorlyqqa qarsy volonterlik» jobasy óz qataryna 2,7 myńnan astam belsendini biriktirdi.

Olardyń kúsh-jigeriniń arqasynda 7 mlrd teńgeden astam somaǵa taýarlar men qyzmetterge baǵany kóterý táýekelderine jol berilmedi.

Mysaly, jemqorlyqqa qarsy eriktiler Oral qalasynyń ákimdiginiń 45 mln teńge somasyna beınekonferentsbaılanys jabdyǵyn satyp alýyn toqtatty, sebebi uqsas jabdyqtyń naryqtyq quny shamamen 4 mln teńgeni quraıdy.

Shymkent qalasynyń eriktileri bilim basqarmasymen jáne birneshe mekteptermen jetim balalarǵa arnalǵan jazǵy demalysty uıymdastyrý boıynsha satyp alýdy qaıtalaý faktisin anyqtady. Ýaqytyly den qoıý nátıjesinde bıýdjet qarajatynyń 78 mln teńge somasynda tıimsiz jumsalýyna jol berilmedi.

Túrkistan qalasynda eriktiler jylý energııasyn esepteý kezinde tarıfterdi negizsiz kóterý faktisin anyqtady. Kóp qabatty turǵyn úılerde esepteý quraldary ornatylǵanyna qaramastan, esepteý sharshy metrmen júrgizilgen, bul jylytý qunynyń ósýine ákeldi.

Qabyldanǵan sharalardyń nátıjesinde 32 kópqabatty turǵyn úıdiń 2 myńnan astam turǵyny úshin shamamen 13 mln teńgege qaıta esepteý júrgizildi.

Elordada eriktiler «Jumys isteıtin jastarǵa arnalǵan jalǵa beriletin turǵyn úı» baǵdarlamasy boıynsha berilgen 30 páterdiń jaǵdaıyn tekserdi. Tekserý nátıjeleri boıynsha merdigerler radıatorlar men elektr rozetkalarynyń bolmaýy, sondaı-aq aıaqtalmaǵan qurylys-montaj jumystary jáne basqa da aqaýlar sııaqty kóptegen kemshilikterdi joıdy.

Sybaılas jemqorlyqqa qarsy eriktiler qyzmetiniń arqasynda halyqtyń áleýmettik mańyzdy máselelerin sheshýge baǵyttalǵan qoǵamdyq baqylaý qamtamasyz etiledi.