Sybaılas jemqorlyqqa qarsy is-qımyl sharalaryn qabyldamaǵan basshy ákimshilik jaýapkershilikke tartylýy múmkin

ASTANA. KAZINFORM – Kvazımemlekettik sektor sýbektileriniń basshylary sybaılas jemqorlyqqa qarsy is-qımyl sharalaryn qabyldamaǵany úshin ákimshilik jaýapkershilikke tartylýy múmkin. Bul týraly Premer-Mınıstr Oljas Bektenovtyń Senat depýtattarynyń saýalyna bergen jaýabynda aıtylǵan.

«Sybaılas jemqorlyqqa qarsy is-qımyl týraly» QR Zańy memlekettik organdardyń, uıymdardyń, kvazımemlekettik sektor sýbektileriniń jáne laýazymdy tulǵalardyń óz quzyreti sheginde sybaılas jemqorlyqqa qarsy is-qımyl jónindegi mindetterin qarastyrady. Memlekettik organdardyń, uıymdardyń, kvazımemlekettik sektor sýbektileriniń basshylary qaramaǵyndaǵy qyzmetkerlerdiń sybaılas jemqorlyq quqyq buzýshylyq jasaýynyń aldyn alý jónindegi qyzmettik mindetterin oryndamaǵany nemese tıisinshe oryndamaǵany úshin Qazaqstan Respýblıkasynyń zańnamasyna sáıkes tártiptik jaýapkershilikte bolady. Sonymen qatar «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy aıasynda ákimshilik jaýapkershilikke tartýdy kózdeý usynylady», - dedi Úkimet basshysy jaýabynda.

Oljas Bektenovtiń naqtylaýynsha, kvazımemlekettik sektor sýbektileriniń basshylaryna óz ókilettikteri sheginde sybaılas jemqorlyq quqyq buzýshylyq jasaýǵa kináli ózderine baǵynysty adamdarǵa qatysty sharalar qoldanbaǵany ne QR sybaılas jemqorlyqqa qarsy is-qımyl týraly zańnamasyn buza otyryp, kórsetilgen sharalardy qabyldaǵany úshin júz aılyq eseptik kórsetkish mólsherinde aıyppul túrinde jaýapkershilik júkteledi. 

«Zań jobasyn QR Parlamenti Májilisi birinshi oqylymda maquldady», - dedi Premer-Mınıstr.