Sybaılas jemqorlyqqa batqan nıeti teris kisiler – bizdiń qas jaýymyz – Prezıdent
ASTANA. KAZINFORM — Memleket basshysy Qasym-Jomart Toqaev Qaýipsizdik Keńesiniń shuǵyl otyrysynda «Samuryq Qazyna» ulttyq ál-aýqat qory men «Qazaqstan temir joly» UK» AQ basshylarynyń ustalýyna baılanysty jasaǵan málimdemesinde sybaılas jemqorlyqqa batqan nıeti teris kisiler bizdiń qas jaýymyz ekenin atap ótti.Olar qazirdiń ózinde «Halyqtyq qurylys» baǵdarlamasyn iske asyrýǵa zııan tıgizýdi oılap júr».
– Ózderińizge málim, qazir biz jańa tarıhı kezeńge qadam bastyq. Endi bir orynda turyp qalýǵa, burynǵy jetistikterdi mise tutyp, arqany keńge salýǵa haqymyz joq. Ádiletti Qazaqstandy qurý isinde jalqaýlyq pen selqostyqqa boı aldyrýǵa bolmaıdy. Al sybaılas jemqorlyqqa batqan nıeti teris kisiler – bizdiń qas jaýymyz. Olar qazirdiń ózinde «Halyqtyq qurylys» baǵdarlamasyn iske asyrýǵa kedergi keltirip, zııan tıgizýdi oılap júr. Biz buǵan, álbette, eshqashan jol bermeımiz, - dedi Prezıdent.
Memleket basshysy barlyq áleýmettik ınfraqurylym nysandary, sonyń ishinde joldar, áýejaılar, emhanalar, ońaltý ortalyqtary, shyǵarmashylyq úıleri, mektepter men sport keshenderi sapaly salynýy kerek ekenin aıtty. Bul – múltiksiz oryndalýǵa tıis talap.
– Memleket qarjysynyń tıimdi jumsalýyn arnaıy memlekettik komıssııa qadaǵalaıdy. Onyń quramy kelesi aptanyń basynda jarııalanady. Osylaısha, biz halyqtyń ál-aýqatyn arttyrýdy jáne azamattardyń turmys sapasyn jaqsartýdy kózdeıtin túpki maqsatymyzdy júzege asyrýdy bastaımyz. Osy iste Konstıtýtsııamyzda bekitilgen Zań, Ádilettilik jáne Tártip qaǵıdattary aınymas temirqazyǵymyz bolady. Árıne, bul jol ońaı bolmaıdy. Tipti túrli qıyndyqtar da kezdesetini anyq. Halqymyz «Jol muraty – jetý» dep beker aıtpaǵan. Sondyqtan tabandylyq tanytyp, alǵa qoıǵan maqsattarymyzǵa mindetti túrde qol jetkizemiz, - dedi Qasym-Jomart Toqaev.
Memleket basshysy Qasym-Jomart Toqaev Qazaqstandaǵy sybaılas jemqorlyq ahýaly kúrdeli ekenin aıtyp, jemqorlyqqa qarsy qabyldanyp jatqan sharalar týraly aqparat qoǵamǵa ashyq usynylatynyn málimdedi.