Sybaılas jemqorlyq týraly habarlaǵan almatylyqtar 1,4 mln teńgege jýyq syıaqy aldy
ALMATY. KAZINFORM — Ótken jyly megapolıstiń 8 turǵyny jemqorlyq faktilerin áshkereleýge kómekteskeni úshin aqshalaı syıaqy alǵan. Bul týraly óńirlik kommýnıkatsııalar qyzmetiniń brıfınginde QR Sybaılas jemqorlyqqa qarsy is-qımyl Agenttiginiń Almaty qalasy boıynsha departamentiniń basshysy Arman Rahımov aıtty.
«Sondaı-aq, jyl basynan beri sybaılas jemqorlyq faktilerin habarlaǵan bes tulǵa marapattaldy. Onyń ishinde úsheýi jalpy somasy 741 myń teńge aqshalaı syıaqy alsa, qalǵan eki memlekettik qyzmetker alǵys hattarmen marapattaldy. Almaty qalalyq departamentine sot ákimshiliginiń mamany oǵan qamaýdan bosatý týraly qaýlyny shyǵarýdy jedeldetý úshin para berý faktisi týraly aryzben júgingen. Bul fakt boıynsha atalǵan quqyq buzýshylyqty jasaǵan tulǵaǵa qatysty aıyptaý úkimi shyǵaryldy. Óz kezeginde, maman sybaılas jemqorlyqpen kúreste kómek kórsetkeni úshin alǵys hatpen marapattaldy», — dedi Arman Rahımov.
Sonymen qatar, shekara áskerleriniń qyzmetkeri qaıta tekserýden soń rastalǵan zańsyz quqyq buzýshylyq faktisin habarlap, kóshi-qon salasyndaǵy zańnamanyń buzylýynyń aldyn aldy.
«Almaty qalasynyń turǵyndaryn da sybaılas jemqorlyqqa qarsy kúreske belsene atsalysýǵa shaqyramyz. Naqty zań buzýshylyq faktileri týraly Sybaılas jemqorlyqqa qarsy qyzmettiń 1424 telefony arqyly habarlaýǵa nemese Agenttiktiń aýmaqtyq departamentterine júginýge bolady», — dedi Arman Rahımov.
