Sıanda Almatyǵa deıingi halyqaralyq dostyq velosherýi bastaldy

SIANЬ.QazAqparat – «Sıan-Almaty» dostyq velosherýine qatysýshylar seısenbi kúni Sıan qalasynan (Shensı provıntsııasy) shyqty. QHR aýmaǵyndaǵy ejelgi Jibek joly arqyly ótetin sherýge Qytaıdan 30 veloshabandoz qatysýda. Qazaqstan aýmaǵyna ótkende olarǵa qazaqstandyq sportshylar da qosylady, dep habarlaıdy QazAqparat.

Aktsııa uıymdastyrýshylary men velosıpedshiler Sıan qalasyndaǵy «Jibek jolynyń bastaýy» dep atalatyn tarıhı jerde ótken velosherýdiń saltanatty ashylý rásimine jınaldy.

«Jańa Jibek joly» qoǵamdyq qorynyń basshysy Hýseın Daýrov quttyqtaý sózinde «Sıan-Almaty» velosherýi Qazaqstan men Qytaı halyqtary arasyndaǵy dostyqty nyǵaıtýǵa jáne eki el arasyndaǵy dıplomatııalyq qarym-qatynastyń qurylǵanyna 30 jyl tolýyna oraı uıymdastyrylǵanyn aıtty.

«Sıan-Almaty» dostyq velosherýine qatysýshylar 4 myń shaqyrym qashyqtyqty júrip ótedi. Qytaı aýmaǵynda bul baǵyt Shensı (Sıan, Sanıan, Baotszı), Gansý (Lanchjoý, Dýnhýan) jáne Shyńjań (Hamı, Týrfan, Úrimshi, Qorǵas) provıntsııalary arqyly ótedi.
Qazaqstan aýmaǵynda velosherýge qazaqstandyq sportshylar qosylyp, qatysýshylar 2023 jyldyń 7 qyrkúıeginde halyqaralyq kópkúndik velotýrdy Almatyda aıaqtaıdy.