Sı Tszınpın AQSh-pen «saýda soǵysy» aıasynda odaqtastarymen qarym-qatynasty nyǵaıtyp jatyr

ASTANA. KAZINFORM – QHR Tóraǵasy Sı Tszınpın 14-15 sáýirde Vetnamǵa bardy. Bul Qytaı Kóshbasshysy úshin bıylǵy alǵashqy sapar, dep habarlaıdy Kazinform menshikti tilshisi.

Hanoıda Sı Tszınpın birqatar kezdesýler ótkizip, onda kóp másele qamtyldy.

Naqtyraq aıtqanda, ol Vetnam Kommýnıstik partııasy Ortalyq komıtetiniń Bas hatshysy To Lammen, Vetnam Sotsıalıstik Respýblıkasynyń prezıdenti (VSR) Lyong Kyongpen, VSR premer-mınıstri jáne Ulttyq jınalys múshesi (parlament) Fam Mın Chınmen jáne Chan Than Manmen kezdesti.

Hanoıdaǵy kelissózderden soń Qytaı men Vetnam kóshbasshylary baılanys, jasandy ıntellekti, aýyl sharýashylyǵy ónimderi men saýda sııaqty ózge de birqatar salalardy qamtıtyn, taraptar qol qoıǵan ekijaqty yntymaqtastyq jónindegi 45 qujatpen tanysty.

Taraptar barlyq salany qamtıtyn strategııalyq seriktestikti odan ári tereńdetý týraly birlesken málimdeme jasady.

QHR Tóraǵasy Vetnam basshysymen kelissózder barysynda qytaı-vetnam qatynastaryn nyǵaıtýǵa baǵyttalǵan birqatar shara usyndy.

Olardyń arasynda standartty aralyqtaǵy temirjoldardy, avtomagıstarldar men ıntellektýaldyq aılaqtardy keshendi biriktirý, jasandy ıntellekt pen ınternet zattar, joǵary tehnologııalar salasyndaǵy yntymaqtastyqty nyǵaıtý sharalary bar.

Sı Tszınpın sonymen qatar taraptardy erkin saýda men óndiris pen onimdi ótkizýdiń jahandyq tizbegin qorǵaýǵa shaqyrdy.

Vetnam premer-mınıstri Fam Mın Chınmen kezdesý barysynda Qytaı basshysy eki eldi ınfraqurylymdyq qurylys baǵytyndaǵy yntymaqtastyqty úzdiksiz damyta otyryp, ózara baılanys deńgeıin arttyrýǵa shaqyrdy.

Vetnam prezıdenti Lyong Kyongpen kezdesýinde Qytaı tarapy eki el ókilderin de ýnılateralızm men kúsh saıasatyna birlesip, qarsy turýǵa shaqyrdy.

- Saýda soǵysy halyqaralyq saýda júıesine, jahandyq ekonomıkalyq tártip pen álemniń barlyq elderiniń, ásirese damýshy elderdiń zańdy múddelerine nuqsan keltiredi,- dep keltiredi Sı Tszınpınniń sózin Sınhýa.

Sı Tszınpın óziniń Vetnamǵa saparyn qysqa bolsa da nátıjeli boldy dep esepteıtinin aıtty.