Sı Tszınpınniń elordaǵa sapary kezinde qaı kósheler ýaqytsha jabylady

ASTANA. KAZINFORM – 16-18 maýsym aralyǵynda Astanaǵa QHR Tóraǵasy Sı Tszınpın resmı saparmen keledi. Al 17 maýsym kúni elordada Ortalyq Azııa memleketteri basshylarynyń qatysýymen «Qytaı – Ortalyq Azııa» iskerlik keńesiniń ekinshi otyrysy ótedi.

Astana qalasy ákimdigi resmı saıtynyń habarlaýynsha, osy is-sharaǵa baılanysty bas qalada 16-18 maýsym aralyǵynda birqatar kóshede kólik qozǵalysyna ýaqytsha shekteýler engiziledi.

Jol qozǵalysy myna ýchaskelerde toqtatylady:

Qabanbaı batyr dańǵyly Nursultan Nazarbaev halyqaralyq áýejaıynan bastap Máńgilik El dańǵylyna deıin;

Máńgilik El dańǵyly Qabanbaı batyr dańǵylynan D.Qonaev kóshesine deıin;

Qonaev kóshesinen Qabanbaı batyr dańǵylyna deıingi aralyq;

Qabanbaı batyr dańǵylynyń Qorǵaljyn tas jolyna deıingi bóligi.

Sondaı-aq 2025 jylǵy 17 maýsym kúni myna kóshelerde ýaqytsha qozǵalys shekteledi:

Kereı-Jánibek handar kóshesi – Máńgilik El dańǵylynan bastap Sherhan Murtaza kóshesine deıin;

Táýelsizdik dańǵyly – Kereı-Jánibek handar kóshesinen A. Baıtursynuly kóshesine deıin.

Buǵan qosa, 17 maýsymda saǵat 14:00-den 20:30-ǵa deıin Beıbitshilik jáne kelisim saraıy mańyndaǵy Q. Amanjolov jáne J.Nájimedenov kóshelerinde kólik qozǵalysy ýaqytsha shekteledi. 

Júrgizýshiler men jaıaý júrginshiler jol qozǵalysynda bolatyn ózgeristerdi eskere otyryp, baǵytyn aldyn ala josparlaǵany jón.

Qoǵamdyq qaýipsizdikti qamtamasyz etý jáne joldaǵy qolaısyzdyqty azaıtý maqsatynda ýaqytsha jol belgileri men nusqaǵyshtar ornatylady.

Eske sala keteıik, buǵan deıin Almatyda Radostovets kóshesiniń bóligi 1,5 aıǵa jabylatynyn habarlaǵan edik.