Sı Tszınpın jeti jyldan keıin Soltústik Koreıaǵa qaıta barady
ASTANA. KAZINFORM – Qytaı tóraǵasy Sı Tszınpın Soltústik Koreıaǵa baryp, el kóshbasshysy Kım Chen Ynmen kelissóz júrgizedi. Sapar 8–9 maýsym kúnderi ótedi jáne Qytaı basshysynyń Phenıanǵa 2019 jyldan bergi alǵashqy sapary bolmaq, dep habarlaıdy BBC.
Habarlamaǵa sáıkes, sapar Kım Chen Ynnyń shaqyrýymen uıymdastyrylyp otyr. Kezdesý Sı Tszınpınniń birneshe apta buryn Beıjińde AQSh prezıdenti Donald Tramp pen Reseı prezıdenti Vladımır Pýtındi qabyldaǵanynan keıin ótkeli otyr.
Sebebi Vashıngton, Máskeý jáne Beıjiń Soltústik Koreıa úshin negizgi syrtqy saıası seriktesterdiń qatarynda sanalady.
Qytaı KHDR-dyń basty ekonomıkalyq áriptesi ári mańyzdy saıası odaqtastarynyń biri. Phenıannyń ıadrolyq baǵdarlamasyna baılanysty halyqaralyq sanktsııalar engizilgenine qaramastan, eki el arasyndaǵy baılanys tyǵyz kúıinde qalyp otyr.
Kennam ýnıversıtetiniń Soltústik Koreıa máseleleri jónindegi sarapshysy Lım Yl Chholniń pikirinshe, Beıjiń Phenıandy óziniń dıplomatııalyq strategııasyna belsendirek tartýǵa jáne ózgerip jatqan álemdik tártip jaǵdaıynda yntymaqtastyqty nyǵaıtýǵa umtylýy múmkin.
Qytaı men Soltústik Koreıany uzyndyǵy shamamen 1 400 shaqyrym bolatyn ortaq shekara baılanystyrady. Eki memleket arasynda ózara qorǵanys týraly kelisim bar. Bul – Qytaıdyń basqa memleketpen jasasqan jalǵyz osyndaı kelisimi.
Qujat taraptardyń birine shabýyl jasalǵan jaǵdaıda ózara qoldaý kórsetýdi qarastyrady. 2026 jyly atalǵan kelisimniń jasalǵanyna 65 jyl tolady.
Aıta keteıik, buǵan deıin Sı Tszınpınniń osy jyldyń kúzinde Donald Tramptyń shaqyrýymen AQSh-qa memlekettik saparmen baratyny habarlanǵan.
Al AQSh pen Qytaı prezıdentiniń kezdesýi Ortalyq Azııaǵa qalaı áser etetini jónindegi sarapshy pikirin myna jerden oqı alasyz.
