Sı Tszınpın: Jeke sektordyń qıyndyqqa tap bolǵany ras, biraq bári ýaqytsha
ASTANA. KAZINFORM – Qytaı Kommýnıstik partııasynyń Bas hatshysy, Qytaı Halyq Respýblıkasynyń Tóraǵasy Sı Tszınpın 17 aqpan kúni Beıjińde jeke kásipkerlermen kezdesý ótkizdi, dep habarlaıdy Sınhýa agenttigi.
Aldymen jeke kásipkerlerdiń pikirin tyńdaǵan Sı Tszınpın Qytaıda jeke kásipkerliktiń reforma men ashyqtyq saıasaty aıasynda qarqyndy damyp kele jatqanyn atap ótti. Búginde eldegi jeke sektordyń kólemi aýyz toltyryp aıtarlyqtaı aýqymdy deńgeıge jetip, ekonomıkanyń mańyzdy quramdas bóligine aınalyp úlgergen. Jeke kásipkerlikti sapaly damytýǵa elde berik negiz qalanǵan.
Onyń pikirinshe, jańa dáýirde Qytaıda reforma men ashyqtyq saıasaty odan ári alǵa jyljyp, tereńdeı túspek, al 1,4 mlrd-tan astam tutynýshysy bar iri naryq jeke sektordyń damýyna jańa múmkindik pen keń óris usynady.
Ol qazirgi ýaqytta jeke kásipkerliktiń damýy birqatar qıyndyq pen synaqqa tap bolyp otyrǵanyn moıyndady. Onyń aıtýynsha, bular negizinen reformany tereńdetý jáne salany transformatsııalaý men jańǵyrtý úderisinde týyndaǵan shekteýli, ýaqytsha jáne sheshýge bolatyn máseleler.
Sı Tszınpın jeke kásipkerlikti damytýǵa baǵyttalǵan saıasat pen sharalardy naqty ári tııanaqty iske asyrýdyń mańyzdylyǵyn atap ótti. Ol jeke kásipkerlikti qarjylandyrýdyń “qıynǵa toqtaýy men qymbatqa túsýin” sheshý, jeke kásiporyndardyń alashaǵyn ýaqtyly tóleý, zańnyń atqarylýyna baqylaýdy kúsheıtý jáne jeke bızneske qatysty basy artyq alymdar men aıyppuldardy, tekserý men tárkileýdi bar kúshpen retke keltirý, sóıtip, jeke kásipkerlerdiń múddesin zańǵa sáıkes qorǵaý kerek dep atap ótti.
Sonymen qatar, kez kelgen menshik nysanyndaǵy kásiporynnyń zańsyz áreketi jaýapkershilikten tys qalmaýy tıis ekenin eskertti. Onyń aıtýynsha, Memleket pen bıznes arasyndaǵy ashyq ári taza qarym-qatynasty nyǵaıta túsý úshin barlyq kásiporynǵa birdeı kózqaras ustaný qajet.
DW agenttiginiń jazýynsha, sońǵy jyldary Sı Tszınpın «ortaq ál-aýqatqa» qol jetkizýdi basty maqsat retinde atap, jeke kásipkerlerdi Qytaı Kommýnıstik partııasymen jáne qytaılyq sotsıalızmmen saıası, ıdeologııalyq jáne emotsıonaldyq biregeılikti saqtaýǵa tartýdyń qajettiligin birneshe ret málimdegen bolatyn. Qazirgi kúnde Qytaıda jeke kásipkerliktiń damýy aýyr qysymǵa ushyrap otyr degen pikir jıi aıtylyp keledi.
Sońǵy jyldary Qytaı ekonomıkasynyń ósimi baıaýlap, jyljymaıtyn múlik naryǵynda daǵdarys etek alyp keledi. Onyń ústine tutynýshylyq suranys tómendep, jastar arasyndaǵy jumyssyzdyq deńgeıi joǵary kórsetkishti kórsetip otyr.
Sarapshylardyń pikirinshe, bılik osy kezdesý arqyly jeke kásipkerlikke qaıtadan senim artyp, qoldaý kórsetýge daıyn ekenin bildirgisi keledi.
Aıta keteıik, Almaty men Qytaıdyń iri qalalary arasyndaǵy áýe baǵyttary keńeıtilmek.