Sı Tszınpın Túrikmenstannan Qytaıǵa gaz jetkizý kólemin ulǵaıtýǵa shaqyrdy

ASTANA. KAZINFORM - Qytaı Halyq Respýblıkasynyń tóraǵasy Sı Tszınpın Túrikmenstannan Qytaıǵa jetkiziletin gaz kólemin ulǵaıtýdy usyndy. Ol energetıka jáne shıkizattyq emes sektorlar boıynsha yntymaqtastyqty keńeıtýdiń mańyzyn atap ótti, dep habarlaıdy Kazinform Sınhýa agenttigine silteme jasap.

QHR tóraǵasy qytaı-túrikmen áriptestigin keńeıtý qajettigin málimdedi. Onyń ishinde tabıǵı gaz jetkizilimin arttyrý, saýda men ınvestıtsııa kólemin ulǵaıtý máseleleri bar. Sondaı-aq ınfraqurylym, aýyl sharýashylyǵy, tsıfrlyq ekonomıka, jasandy ıntellekt jáne taza energetıka sııaqty shıkizattyq emes baǵyttarǵa basymdyq berý usynyldy. Bul týraly Sı Tszınpın Gýrbangýly Berdymuhamedovpen Beıjińde ótken kezdesý barysynda aıtty.

Qytaı tarapy «Bir beldeý – bir jol» bastamasyn Túrikmenstannyń damý strategııasymen ushtastyrýdy qoldaıtynyn jetkizdi. Sonymen qatar bilim berý jáne densaýlyq saqtaý salalaryn qamtıtyn birlesken jobalardy iske asyrý, gýmanıtarlyq baılanystardy tereńdetý máseleleri de kún tártibinde tur.

Beıjiń Túrikmenstannyń egemendigi men beıtarap mártebesin qoldaıtynyn rastady. Sondaı-aq halyqaralyq alańdarda, sonyń ishinde Birikken Ulttar Uıymy aıasynda ózara úılestirýdi kúsheıtýge daıyn ekenin málimdedi. Taraptar qaýipsizdik baǵytyndaǵy yntymaqtastyqty nyǵaıtyp, terrorızm, ekstremızm jáne separatızmge qarsy birlesip áreket etýge nıetti.

Óz kezeginde Gýrbangýly Berdymuhamedov Qytaımen strategııalyq áriptestikti nyǵaıtýǵa beıildi ekenin rastady. Ol energetıka, saýda jáne ınfraqurylym salalaryndaǵy yntymaqtastyqty keńeıtýge múddeli ekenin atap ótti.

Buǵan deıin AQSh prezıdenti Donald Tramp Qytaı tarapynyń onyń Beıjińge saparyn bir aıǵa shegerýin suraǵanyn habarlaǵan bolatyn. Sondaı-aq sáýir aıynyń basyna josparlanǵan joǵary deńgeıdegi kezdesý de keıinge qaldyrylýy múmkin.