Qytaı men Laos 2026 jyldy Dostyq jyly dep jarııalady
ASTANA. KAZINFORM — Qytaı Halyq Respýblıkasynyń tóraǵasy Sı Tszınpın beısenbi kúni Laos Halyqtyq-revolıýtsııalyq partııasy OK-niń Bas hatshysy, Laos prezıdenti Thonglýn Sısýlıtke joldaǵan jaýabynda 2026 jyldy Qytaı men Laos arasyndaǵy Dostyq jyly dep jarııa etti, dep habarlaıdy Sınhýa.
Hatynda Sı Tszınpın Thonglýn Sısýlıttiń bastamasyn qoldap, Dostyq jylyna arnalǵan birqatar is-sharanyń bastalatynyn málimdedi.
QHR tóraǵasy Qytaı men Laostyń talaı urpaqtan beri tatý kórshi ári senimdi dos ekenin, sondaı-aq ortaq ıdealdar men bolashaqty bólisetin seriktes ári joldas memleketter ekenin atap ótti.
Sı Tszınpın sońǵy jyldary eki el ózara tıimdi damý jolyn ustanyp, syn-qaterlerge birlik pen yntymaqtastyq arqyly jaýap berip kele jatqanyn, negizgi ulttyq múddelerge qatysty máselelerde bir-birin berik qoldap, sonyń nátıjesinde eki halyqqa da naqty paıda tıgizgenin aıtty.
Qytaı kóshbasshysy Thonglýn Sısýlıtpen ótkizgen kóptegen kezdesýin eske alyp, sol kelissózder barysynda qytaı-laos taǵdyrlas qaýymdastyǵyn tereńdetý jóninde mańyzdy ortaq túsinikke qol jetkizilgenin jáne jańa jaǵdaıdaǵy partııaaralyq ári memleketaralyq qatynastardy damytý jospary aıqyndalǵanyn jetkizdi.
Jańa jylmen birge jańarý kezeńi bastalatynyn aıta kele, Sı Tszınpın qytaı-laos qarym-qatynastary búginde óz tarıhyndaǵy eń joǵary deńgeıge jetkenin jáne damý perspektıvalarynyń keń ekenin atap ótti.
Ol Qytaı Laospen qarym-qatynasty árdaıym strategııalyq ári uzaq merzimdi turǵyda qarastyratynyn málimdedi. QHR Tóraǵasynyń aıtýynsha, dıplomatııalyq qatynastardyń ornaǵanyna 65 jyl tolýyn jáne Dostyq jylyn paıdalana otyryp, dástúrli dostyqty nyǵaıtýǵa, praktıkalyq yntymaqtastyqty tereńdetýge, strategııalyq úılestirýdi kúsheıtýge jáne qytaı-laos taǵdyrlas qaýymdastyǵyn memleketaralyq qatynastardyń aldyńǵy qataryna shyǵarýǵa daıyn. Bul óz kezeginde óńirdegi beıbitshilikke, turaqtylyqqa, damý men órkendeýge zor úles qospaq.
Óz kezeginde Thonglýn Sısýlıt Sı Tszınpındi Jańa jylmen quttyqtap, QHR tóraǵasynyń qamqorlyǵy men basshylyǵynyń arqasynda Laos pen Qytaı arasyndaǵy dástúrli dostyqtyń nyǵaıǵanyn, saıası ózara senimniń tereńdegenin jáne jan-jaqty strategııalyq yntymaqtastyqtyń mol nátıjeler bergenin alǵa tartty.
Laos prezıdenti óz eliniń tıisti vedomstvolaryna Qytaı tarapymen birlese otyryp, dıplomatııalyq qatynastardyń 65 jyldyǵyn jáne Dostyq jylyn joǵary deńgeıde ótkizýge tapsyrma beretinin, joǵary standarttarǵa, sapa men deńgeıge saı laos-qytaı taǵdyrlas qaýymdastyǵyn qurýdy jalǵastyratynyn aıtty.
Sondaı-aq ol jańa dáýirde ekijaqty qatynastar men barlyq saladaǵy praktıkalyq yntymaqtastyqty jańa deńgeıge kóterip, adamzattyń ortaq taǵdyr qaýymdastyǵyn qalyptastyrýǵa úlgi bolýǵa nıetti ekenin jetkizdi.
Budan buryn Kazinform tilshisi Qytaı ekonomıkasyn JI arqyly qalaı damytyp jatqanyn zerdelep kórdi.