Sı Tszınpın men Donald Tramp Beıjińde kelissóz júrgizdi
ASTANA. KAZINFORM — Qytaı Halyq Respýblıkasynyń Tóraǵasy Sı Tszınpın 14 mamyr kúni Beıjińdegi Halyq jınalysy saraıynyń shyǵys alańynda AQSh prezıdenti Donald Trampty resmı qarsy alý rásimin ótkizdi. Bul týraly Sınhýa agenttigi habarlady.
Odan keıin eki el basshysy Halyq jınalysy saraıynda kelissóz júrgizdi.
Qytaı tarapynyń málimetinshe, Sı Tszınpın kezdesý barysynda Qytaı men AQSh arasyndaǵy ortaq múddeler qaıshylyqtardan áldeqaıda kóp ekenin atap ótti. Onyń aıtýynsha, ekijaqty qarym-qatynastyń turaqty bolýy búkil álem úshin mańyzdy.
— Eki memleket qarsylas emes, seriktes bolýy kerek. Biz bir-birimizge qoldaý kórsetip, ortaq órkendeýge umtylýymyz qajet, — dedi Qytaı kóshbasshysy.
Sonymen qatar «Amerıka daýysy» radıosynyń habarlaýynsha, kelissózden keıin eki el basshysy Beıjińdegi Tıantan ǵıbadathanasyna birge barady dep josparlanǵan.
Aq úıdiń málimdeýinshe, Donald Tramp pen Sı Tszınpın beısenbi kúni ıÝNESKO-nyń Búkilálemdik muralar tizimine engen tarıhı keshendi aralap kóredi.
1420 jyly salynǵan Tıantan ǵıbadathanasy Qytaı ımperatorlary eginniń mol bolýyn tilep, «aspan mandaty» negizindegi bıligin aıqyndaıtyn rásimder ótkizgen oryn retinde belgili. Sondyqtan bul nysan Qytaı úshin erekshe saıası ári mádenı sımvol sanalady. Tıantan keshenindegi «Mol ónim tileý ǵıbadathanasynyń» Donald Tramp úshin de sımvoldyq máni bolýy múmkin. AQSh prezıdenti Qytaıdyń amerıkalyq fermerler óndiretin soıa, astyq jáne et ónimderin kóbirek satyp alýyna múddeli. Qytaı qazirgi tańda AQSh aýyl sharýashylyǵy ónimderiniń eń iri eksporttyq naryqtarynyń biri bolyp otyr.
Aıta keteıik, Donald Tramptyń bul sapary — onyń 2017 jyldan bergi Qytaıǵa jasaǵan alǵashqy sapary. Kezdesý AQSh pen Qytaı arasyndaǵy saýda qaıshylyqtary, ózara senimniń álsireýi jáne jasandy ıntellekt salasyndaǵy básekeniń kúsheıgen kezeńinde ótip jatyr.
