Sı Tszınpın memlekettik saparmen Qyrǵyzstanǵa barady
ASTANA.KAZINFORM - Qytaı tóraǵasy Sı Tszınpın 30 tamyzda Sadyr Japarovtyń shaqyrýymen Qyrǵyzstanǵa memlekettik saparmen barady, dep habarlaıdy agenttiktiń Bishkektegi tilshisi.
Qyrǵyzstan prezıdenti baspasóz qyzmetiniń habarlaýynsha, kelissózder barysynda Qyrǵyzstan men Qytaı arasyndaǵy jan-jaqty strategııalyq seriktestikti odan ári damytýǵa qatysty ózekti máseleler talqylanady. Sapardan keıin birqatar memleketaralyq, úkimetaralyq jáne vedomstvoaralyq qujattarǵa qol qoıý josparlanǵan.
Sonymen qatar, Qytaı Halyq Respýblıkasynyń Tóraǵasy Qyrǵyzstan táýelsizdiginiń 35 jyldyǵyna arnalǵan merekelik is-sharalarǵa, Shanhaı yntymaqtastyq uıymyna múshe memleketter basshylary keńesiniń otyrysyna jáne Dúnıejúzilik kóshpendiler oıyndarynyń ashylý saltanatyna qatysady.
- Qytaı tóraǵasynyń aldaǵy memlekettik sapary berik dostyqqa, ózara senimge jáne qoldaýǵa negizdelgen qyrǵyz-qytaı qarym-qatynasyn odan ári nyǵaıtýdaǵy mańyzdy kezeń bolady, - delingen málimdemede.
Esterińizge sala keteıik, 2026 jyldyń 31 tamyzynan 1 qyrkúıegine deıin Bishkekte Qyrǵyzstannyń tóraǵalyǵymen ShYU-ǵa múshe memleketter basshylary keńesiniń otyrysy ótedi.
Qazaqstan Qyrǵyzstannyń ShYU-daǵy bastamalaryn qoldaýǵa daıyn ekenin bildirdi.
ShYU sammıtine baılanysty Bishkek turǵyndaryna qaladan ýaqytsha ketýge keńes berildi.
