Sı Tszınpın Qytaıdaǵy joıqyn órtten keıin shuǵyl sharalar qabyldaýdy tapsyrdy
ASTANA. KAZINFORM — QHR tóraǵasy Sı Tszınpın Qytaıdyń shyǵysyndaǵy Fýtszıan provıntsııasyna qarasty Tszıntszıan qalalyq ýezindegi aıaq kıim fabrıkasynda beısenbi kúni bolǵan, kóptegen adamnyń qaza tabýyna ákelgen órtten keıin izdestirý-qutqarý jumystaryn júrgizýge bar kúshti jumyldyrýǵa shaqyrdy.
Sınhýa taratqan aqparatqa sáıkes, Qytaı Kommýnıstik partııasy Ortalyq komıtetiniń Bas hatshysy jáne Ortalyq áskerı keńestiń tóraǵasy qyzmetterin qatar atqaratyn Sı Tszınpın oqıǵanyń sebepterin múmkindiginshe tez anyqtap, kinálilerdi qatań jaýapkershilikke tartý qajettigin atap ótti.
QHR tóraǵasy jyl basynan beri elde birneshe iri óndiristik apat bolǵanyn eske saldy. Onyń aıtýynsha, barlyq óńir men salalyq vedomstvolar alynǵan sabaqtardy tereń zerdelep, damý men qaýipsizdik máselelerin tıimdi úılestirip, óndiristegi qaýipsizdikke únemi basa nazar aýdarýy tıis.
Qytaı basshysy táýekelder men jasyryn qaýip-qaterlerdi anyqtaý jáne joıý jumystaryn kúsheıtýdi, óndiristik qaýipsizdikti qamtamasyz etý sharalaryn adal ári muqııat oryndaýdy, iri jáne asa iri jazataıym oqıǵalardyń aldyn alýdy, sondaı-aq azamattardyń ómiri men múlkiniń qaýipsizdigin naqty qorǵaýdy talap etti.
QKP OK Saıası bıýrosy Turaqty komıtetiniń múshesi, QHR Memlekettik keńesiniń Premeri Lı Tsıan Memlekettik keńes janyndaǵy óndiristik qaýipsizdikti qamtamasyz etý komıtetiniń keńsesine jergilikti bılik organdaryn óndiristik qaýipsizdik salasyndaǵy táýekelder men jasyryn qaýip-qaterlerge jan-jaqty tekserý júrgizýge yntalandyrýdy tapsyrdy. Bul iri jáne asa iri tótenshe oqıǵalardyń tolyq aldyn alýǵa baǵyttalǵan.
Qazir Qytaıdaǵy órt saldarynan qaza tapqandar sany 28 adamǵa jetkeni rastaldy.
Qytaıdyń Tótenshe jaǵdaılardy basqarý mınıstrligi qutqarý jumystaryn úılestirý úshin Tszıntszıanǵa arnaıy jumys tobyn jiberdi. Al Fýtszıan provıntsııasy zardap shekkenderdi qutqarý men oqıǵanyń saldaryn joıý úshin barlyq kúshti jumyldyrdy.
Osydan buryn Qytaıdyń Gýansı-Chjýan avtonomııalyq aýdanynda bolǵan sý tasqyny saldarynan haıýanattar baǵynan 100-den astam janýardy sý aǵyzyp áketkeni belgili boldy.
