Sı Tszınpın: Qytaı ekonomıkasy birqatar qıyndyqqa tap boldy
ASTANA. KAZINFORM – Qazirgi kúnde Qytaı ekonomıkasy birqatar qıyndyq pen syn-qaterge tap bolyp otyr. Sondyqtan senimdi nyǵaıtyp, kúrdeli máselelerdi júıeli túrde sheshýge týra keledi. Bul týraly Qytaı Kommýnıstik partııasy Ortalyq komıtetiniń Bas hatshysy Sı Tszınpın 30 shilde kúni partııa quramynda joq tulǵalarmen ótken keńeste málimdedi.
Lianhe Zaobao basylymynyń habarlaýynsha, Beıjińdegi Chjýnnanhaı rezıdentsııasynda ótken alqaly keńeste Qytaıdyń qazirgi ekonomıkalyq ahýaly men jyldyń ekinshi jartysyndaǵy ekonomıkalyq saıasat týraly demokratııalyq partııalar men Búkilqytaılyq ónerkásip jáne saýda assotsıatsııasynyń ókilderiniń, sondaı-aq partııasyz qoǵam qaıratkerleriniń pikirleri tyńdaldy.
Sı Tszınpın keńeste ekinshi jartyjyldyqtaǵy ekonomıkalyq jumystyń negizgi mindetterine toqtalyp, ishki jáne syrtqy jaǵdaılardy jan-jaqty, keshendi túrde qarastyryp, ekonomıkalyq ósimniń jańa draıverine aýysýdy jedeldetý qajet ekenin atap kórsetken. Onyń aıtýynsha, Qytaı bıligi neǵurlym belsendi qarjylyq saıasat pen ortasha erkin valıýta saıasatyn júzege asyryp, qoldanystaǵy qoldaý sharalarynyń tıimdiligin tolyq paıdalanýǵa kúsh salady.
Sonymen qatar ol ishki suranysty keńeıtý, usynymdy jetildirý, damýdyń qozǵashy kúshin nyǵaıtý jáne qoǵamnyń ómirsheńdigin arttyrý, ekonomıkanyń turaqty túrde jańa serpinmen jaqsy baǵytqa qaraı damýyn ilgeriletý maqsatynda qosymsha tıimdi saıasattardy ýaqytyly túrde qabyldaý keregin atap ótti.
Onyń aıtýynsha, ekinshi jartyjyldyqta makroekonomıkalyq saıasattyń tıimdiligin arttyrýǵa basa nazar aýdarylady. Basym baǵyttardyń qatarynda ol ishki tutyný áleýetin ashý, ǵylymı-tehnologııalyq jáne ónerkásiptik ınnovatsııalardy tereń yqpaldastyrý, syrtqy álemge ashyqtyqty joǵary deńgeıde keńeıte túsý, halyqtyń ál-aýqatyn pármendi túrde qamtamasyz etý jáne jaqsartý, ekonomıkanyń negizgi salalaryndaǵy táýekelderdi birtindep seıiltý mindetterin atady.
Sı Tszınpın sondaı-aq demokratııalyq partııalar men Búkilqytaılyq ónerkásip jáne saýda assotsıatsııasyn jáne partııasyz qoǵam qaıratkerlerin QKP OK-niń qazirgi ekonomıkalyq jaǵdaı týraly tujyrymy men qabyldaǵan sheshimderin qoldaýǵa, damýǵa senimdi nyǵaıtýǵa jáne eldiń bıylǵy áleýmettik-ekonomıkalyq damý maqsattaryn birlesip iske asyrýǵa shaqyrdy.
Sol kúni QKP OK-niń Saıası bıýrosy da otyrys ótkizdi, onda QKP OK-niń V plenýmyn osy jyldyń qazan aıynda ótkizý týraly sheshim qabyldandy. Jıynda eldegi ekonomıkalyq ahýalǵa taldaý jasalyp, ekonomıkalyq qyzmettegi qıyndyqtar men syn-qaterlerge aıryqsha nazar aýdarý, senimnen aýytqymaý qajettigi atap ótildi.
Otyrys qorytyndysyna sáıkes, ekinshi jartyjyldyqta ishki suranysty keńeıtý, usynymdy jetildirý maqsatynda qosymsha tıimdi sharalardy jedel engizý, sondaı-aq qyzmet kórsetý saýdasyn barynsha damytý, saýdanyń birkelki damýyn ilgeriletý mindetteri aıqyndaldy.
Buǵan deıin Qytaıdyń dástúrli farfor óndirisi ıÝNESKO-nyń Búkilálemdik muralar tizimine engenin habarlaǵan edik.
