Sı Tszınpın Kım Chen Ynmen kelissóz júrgizdi

ASTANA. KAZINFORM – Qytaı Koreı túbeginde beıbitshilik pen turaqtylyqty saqtaý maqsatynda KHDR-men úılestirýdi odan ári nyǵaıtýǵa daıyn. Bul týraly QHR tóraǵasy Sı Tszınpın Beıjińde ótken Soltústik Koreıa kóshbasshysy Kım Chen Ynmen kelissóz barysynda málimdedi, dep habarlaıdy Kazinform menshikti tilshisi.

– Qytaı men KHDR halyqaralyq jáne aımaqtyq isterde strategııalyq úılestirýdi kúsheıtip, eki eldiń ortaq múddelerin qorǵaýy kerek... Qytaı árqashan obektıvti jáne beıtarap ustanymdy ustanady jáne túbekte beıbitshilik pen turaqtylyqty saqtaý úshin KHDR-men úılestirýdi odan ári nyǵaıtýǵa daıyn, - dep keltirdi Sınhýa agenttigi Sı Tszınpınniń sózin.

Kım Chen Yn óz kezeginde...«halyqaralyq jaǵdaı qalaı ózgerse de, KHDR men Qytaı arasyndaǵy dostyq ózgerissiz qala beredi... KHDR ekijaqty qarym-qatynasty úzdiksiz tereńdetý men damytýdy berik ustanady» dep atap ótti.

– KHDR jańa nátıjelerge qol jetkizý úshin Qytaımen ózara tıimdi saýda-ekonomıkalyq yntymaqtastyqty tereńdetýge daıyn», - dep keltirdi Sınhýa agenttigi Kım Chen Ynnyń sózin.

Eske sala ketsek, 1 qyrkúıekte Soltústik Koreıa Prezıdenti Kım Chen Yn jeke poıyzymen Ekinshi dúnıejúzilik soǵystyń aıaqtalýynyń 80 jyldyǵyn merekeleýge qatysý úshin Beıjińge attanǵanyn jazǵan bolatynbyz.