Sı Tszınpın Beıjińde Sergeı Lavrovty qabyldady

ASTANA. KAZINFORM – Qytaı tóraǵasy Sı Tszınpın sársenbi kúni eki eldiń zańdy múddelerin qorǵaý jáne Álemdik Ońtústik birligin saqtaý úshin Qytaı men Reseıdi strategııalyq úılesimge shaqyrdy, dep habarlaıdy Kazinform agenttiginiń Beıjińdegi tilshisi.

Qytaı kóshbasshysy bul málimdemeni Beıjińdegi Halyq jınalystary zalynda Reseıdiń syrtqy ister mınıstri Sergeı Lavrovpen kezdesýi kezinde jasady. 

Qazirgi halyqaralyq turaqsyz jaǵdaıda Reseı-Qytaı qarym-qatynasyndaǵy turaqtylyq pen senimdilik erekshe mańyzdy ekenin atap ótip, Sı Tszınpın eki tarapty da iri derjavalar jáne BUU Qaýipsizdik Keńesiniń turaqty músheleri retindegi mindettemelerin tolyq oryndaýǵa shaqyrdy. 

– Biz kópjaqty yntymaqtastyqty nyǵaıtý, kópjaqtylyq qaǵıdattaryn berik qorǵaý jáne júzege asyrý, BUU-nyń bedeli men ómirsheńdigin birlesip qalpyna keltirý, ShYU, BRIKS jáne basqa da qurylymdar aıasynda tyǵyz yntymaqtastyq jasaýymyz kerek, halyqaralyq tártiptiń ádil jáne utymdy damýyna yqpal etýimiz kerek, - dep atap ótti Sı Tszınpın. 

Sergeı Lavrov elder saýda jáne ınvestıtsııalyq yntymaqtastyqta jaqsy serpin saqtap otyrǵanyn jáne BUU, ShYU, BRIKS jáne ATES sııaqty kópjaqty forýmdarda tyǵyz baılanysta júrip jatqanyn atap ótti. 

Kelissózder Reseı syrtqy ister mınıstriniń 14 sáýirde bastalǵan Qytaıǵa resmı sapary barysynda ótti. 

Buǵan deıin Sı Tszınpın Taıaý Shyǵysta beıbitshilikti saqtaý úshin tórt tarmaq usynǵan bolatyn.