Sı Tszınpın AQSh-ty birjaqty saýda shekteýlerin engizýden bas tartýǵa shaqyrdy

ASTANA. KAZINFORM – Qytaı amerıka tarapy AQSh-qa ınvestıtsııa salyp jatqan qytaılyq kásiporyndar úshin ádil, alalamaıtyn bıznes-orta qalyptastyrady degen úmitte. Bul týraly QHR tóraǵasy Sı Tszınpın AQSh prezıdenti Donald Tramppen telefon arqyly bolǵan áńgime barysynda málim etti, dep habarlaıdy Kazinform menshikti tilshisi.

Onyń sózi Qytaıdyń syrtqy ister vedomstvosynyń saıtynda jarııalandy. 

- TikTok máselesine qatysty Qytaıdyń ustanymy túsinikti. QHR Úkimeti korporatsııanyń nıetin qurmetteıdi jáne múddelerdiń tepe-teńdigin saqtaı otyryp, Qytaı zańdary men erejelerine sáıkes keletin tıisti sheshim qabyldaý úshin naryq talabyna saı kommmertsııalyq kelissózder júrgizýdi qoldaıdy, - dep keltirdi Sı Tszınpınniń málimdemesin Qytaı SІM saıty.

Sı Tszınpın Qytaı men AQSh arasyndaǵy qatynastardyń mańyzdylyǵyn atap ótti. Bizdiń saýda-ekonomıkalyq máseleler boıynsha komandalarymyzdyń arasynda jýyrda bolǵan konsýltatsııalar teńdik rýhy men ózara qurmetti kórsetti.

- AQSh-tyń kóptegen kelissózderdiń barysynda qol jetkizilgen jetistikterdiń nátıjesin joqqa shyǵaratyn birjaqty saýda shekteýlerin engizýden bas tartqany durys, -dep keltirdi Qytaı tóraǵasynyń sózin SІM resmı saıty.

Qytaı Syrtqy ister mınıstrliginiń saıty keltirgen AQSh prezıdenti Donald Tramptyń sózinshe, Amerıka tarapy Qytaımen uzaqmerzimdi jáne berik qarym-qatynasty qoldaýǵa umtylady. Vashıngton ekijaqty ekonomıkalyq jáne saýda yntymaqtastyǵyn damytýǵa tyrysady, eki komanda arasynda bolyp jatqan konsýltatsııalarǵa qoldaý kórsetedi jáne TikTok máselesiniń de tıimdi sheshimin tabýǵa tyrysyp jatyr.

- AQSh búkil álemde beıbitshilikti saqtaý úshin Qytaımen beıbit qarym-qatynasta bolý jolynda jumys isteıdi, - dep keltirdi Qytaı Syrtqy ister mınıstrliginiń saıty AQSh prezıdentiniń sózin.

Osyǵan deıin AQSh pen Qytaı TikTok boıynsha aldyn ala kelisimge kelgeni týraly jazdyq.