Sı Tszınpın Qytaıdyń ashyqtyǵyn odan ary damytý týraly aıtty
«Tek ashyqtyq pen beıbit damý ǵana jalpyǵa ortaq jeńiske jeteleıdi. Adamzattyń ortaq taǵdyry qoǵamdastyǵyn qurý jaıyndaǵy usynystarymdy kóptegen elder qoldap, BUU-nyń mańyzdy qujattaryna engizilgenine qýanyshtymyn. Biz bir-birimizge qurmetpen qarap, beıbitshilik prıntsıpterin ustanýǵa, basqa elder tańdaǵan áleýmettik júıeler men damý joldaryn qurmetteýge tıispiz», - dedi Sı Tszınpın Boao Azııa forýmynda.
Qytaı basshysynyń sózine qaraǵanda, álem elderi alıanstar qurýǵa emes, seriktestik qarym-qatynastaryn ornatýǵa kúsh salýy, oqshaýlaný jáne «qyrǵı qabaq soǵys» mentalıtetinen bas tartýy, sondaı-aq BUU Jarǵysyna sáıkes halyqaralyq tártipti nyǵaıtýy qajet.
Ol álem elderin kópjaqty saýdaǵa, ınnovatsııalarǵa, bıznestiń jańa formalary men modelderine basa nazar aýdarýǵa, mádenıet, ǵylym-bilim, týrızm, densaýlyq saqtaý, kedeılikti joıý, t.b. salalarda ekijaqty jáne kópjaqty yntymaqtastyqty damytýǵa shaqyrdy.
Onyń aıtýynsha, 2017 jylǵy qazan aıynda ótken QKP 19-sezinde qytaı sotsıalızminiń jańa dáýirge qadam basýy eldiń aldyna reformalardy tereńdetý, ekonomıkany jańǵyrtý, ınnovatsııalardy damytý boıynsha jańa mindetter qoıdy.
QHR Tóraǵasy Qytaı álemge ashyqtyǵyn keńeıtý úshin saýda, ınvestıtsııalyq jáne basqa da salalardy lıberaldandyrý sharalaryn iske asyratynyn aıtty.
«Qytaı ashyq bolý strategııasyn tańdady. Aldymen, QHR naryǵyna kirý múmkindikterin aıtarlyqtaı keńeıtemiz. Qyzmet kórsetý salasynda, atap aıtqanda, qarjy sektorynda jyl sońyna deıin bank, saqtandyrý jáne qor naryqtaryna sheteldikterdiń qatysýyn jeńildetý boıynsha mańyzdy sharalardy qabyldaımyz. Qytaı aýmaǵynda halyqaralyq qarjy ınstıtýttaryn qurýǵa qoıylatyn talaptar jeńildetiledi», - dedi Sı Tszınpın.
Qytaı basshysy búkil álem ókilderin aǵymdaǵy jyly qazan aıynda Shanhaıda ótetin 1-shi Qytaı halyqaralyq ımport kórmesine shaqyrdy.
Eske sala keteıik, Boao Azııa forýmy (BAF) 8-11 sáýir aralyǵynda QHR-dyń Haınan aralynda ótip jatyr. Oǵan álemniń barlyq elderinen kelgen saıası, isker jáne ǵylymı salanyń 2 myńnan astam ókilderi qatysýda.
Forým aıasynda ashylǵan Azııa elderiniń buqaralyq aqparat quraldary lıderleriniń sammıtinde «QazAqparat» HAA-nyń bas dırektory Asqar Ýmarov sóz sóıledi.
Foto: russian.news.cn