Sı Tszınpın Qazaqstan Prezıdentimen ótkizgen kelissózderdi joǵary baǵalady
ASTANA. QazAqparat - Búgin Aqordada elimizge resmı saparmen kelgen QHR Tóraǵasy Sı Tszınpın QR Prezıdenti Nursultan Nazarbaevpen ótkizgen kelissózderin joǵary baǵalady, dep habarlaıdy QazAqparat.
«Qazir ǵana Qazaqstan Prezıdentimen shaǵyn jáne keńeıtilgen quramda dostyqqa toly ári ashyq kelissózderdi tabysty ótkizdik. Ózara múddemizge saı keletin álemdik jáne óńirlik ólshemder boıynsha san qyrly yntymaqtastyqtyń ekijaqy qarym-qatynasyna qatysty tyńǵylyqty pikir almastyq. Kóptegen ýaǵdalastyqqa qol jetkizdik. QHR men Qazaqstan arasyndaǵy birlesken málimdemege qol qoıdyq», - dep atap ótti Sı Tszınpın.
Sonymen qatar ol óziniń Jibek joly ekonomıkalyq beldeýi bastamasyn alǵash ret Qazaqstanda kótergenin, oǵan QR Prezıdenti Nursultan Nazarbaev qoldaý bildirgenin basa aıtty.
«Basty basymdyq Qytaı - Ortalyq Azııa men Taıaý Shyǵys» jańa eýrazılyq qurlyqaralyq kópirin salý bolmaq. Munan bólek, Jibek joly bastamasy men Tsıfrlyq Qazaqstan strategııasyn túıindestirý de mańyzdy. Bul jospar eki eldiń ózara tıimdi yntymaqtastyǵynyń jańa qurylymyn qurýǵa septigin tıgizedi», - dedi QHR Tóraǵasy.
