Sı Tszınpın AÓSShK elderin ortaq kóliktik áleýetti damytýǵa shaqyrdy

DÝShANBE. QazAqparat - Ashyq ári tolerantty Azııany qurý - bizdiń ortaq umtylysymyz. Bul týraly QHR tóraǵasy Sı Tszınpın Dýshanbede AÓSShK sammıtinde málimdedi, dep habarlaıdy QazAqparat tilshisi.

«Damý - barlyq máselelerdi sheshetin kilt. Bizge bul baǵytta kúsh-jiger biriktirýdi jalǵastyrý qajet. «Bir beldeý - bir jol» forýmynda aıtylǵan ýaǵdalastyqtardy eúzege asyrý qajet. Ashyq ári tolerantty Azııany qurý - bizdiń ortaq umtylysymyz. Ashyqtyq bizdiń jolymyzdy keńeıte bersin. Barlyq salalarda ınnovatsııany nyǵaıtý qajet. Túrli ózekti máselelerdi retteý úshin, Azııadaǵy qıyndyqtardy eńserý úshin jańa jaýaptar tabý qajet», - deıdi Sı Tszınpın.

Sonymen birge, Qytaı kóshbasshysy AÓSShK elderin birlesken kóliktik áleýetti belsendi qoldanyp, damytýǵa shaqyrdy.

Aıta keteıik, Azııadaǵy ózara is-qımyl jáne senim sharalary jónindegi keńes 1992 jyldyń 5 qazanynda QR Tuńǵysh Prezıdenti - Elbasy Nursultan Nazarbaevtyń bastamasymen BUU Bas Assambleıasynyń 47-sessııasynda bekitilgen.

AÓSShK óńirdegi beıbitshilikti, qaýipsizdikti jáne turaqtylyqty qamtamasyz etý úshin qurylǵan. Onyń quramyndaǵy 27 memleket Azııa aýmaǵy men halqynyń 90% qamtıdy. Taǵy 8 memleket pen BUU qosqanda 5 halyqaralyq uıym baqylaýshy mártebesine ıe. Memleket pen úkimet basshylarynyń sammıti tórt jyl saıyn ótedi. Sońǵy AÓSShK sammıti 2014 jyly 21 mamyrda Qytaıdyń Shanhaı qalasynda ótti.