ShYU Jastar keńesi jas kásipkerlerge qoldaý kórsetedi
Bul týraly Astanada ótken ShYU Jastar keńesiniń H otyrysynda ShYU Jastar Keńesindegi Reseı ulttyq bóliminiń jaýapty hatshysy, «Reseı jastar odaǵy» jalpyreseılik qoǵamdyq uıym tóraǵasynyń orynbasary Tatıana Selıverstova málimdedi.
«Atalǵan joba ShYU-ǵa múshe memleketterdiń barlyǵyna arnalǵan. Biz árbir qatysýshy eldiń 6 ókilin shaqyramyz. Olar Máskeýge kelgen soń, ShYU aýmaǵyndaǵy bıznes týraly bir aılyq bilim berý baǵdarlamasy bastalady», - dedi Tatıana Selıverstova.
Bıznes-ınkýbator 2017 jyldyń 18 qyrkúıek - 5 qazan aralyǵynda Máskeý energetıkalyq ýnıversıtetinde ótedi. Jaýapty hatshynyń aıtýynsha, qatysýshylar aǵylshyn tilinde Reseıdiń jáne ShYU elderiniń syrtqy ekonomıkalyq qyzmet salasyndaǵy sarapshylarynyń dárisin tyńdaıdy. Bilim berýden bólek, jobada tájirıbelik baǵdarlama da qarastyrylǵan.
«Biz 18-35 jas aralyǵyndaǵy kásipkerlerdi úsh topqa bólemiz jáne ár topta keminde ShYU 3 memleketiniń ókilderi bolady. Bir aı boıy qatysýshylar jetekshilerimen birge óz bıznes-ıdeıalaryn jetildiredi. Daıyn bolǵan bıznes-jobany ınkýbatordyń aqtyq kezeńinde ınvestorlarǵa kórsetedi jáne 1, 2, 3 oryndardyń jeńimpazdary anyqtalady. Oqytý aıaqtalǵan soń árbir qatysýshyǵa biliktiligin kóterý týraly memlekettik úlgidegi sertıfıkat beriledi», - dep tolyqtyrdy ol.
Atap ótken jón, búgin Shanhaı yntymaqtastyq uıymy Jastar forýmy óz jumysyn bastady. Bıylǵy forým Qazaqstannyń Shanhaı yntymaqtastyq uıymyna tóraǵalyǵy aıasynda ótedi. Oǵan Reseı, QHR, Qyrǵyzstan, Tájikstan, Belarýs jáne Pákistan men Úndistannan kelgen jastar uıymynyń kóshbasshylary arnaıy keldi.