ShYU jáne AÓSShK lańkestikke qarsy birlese kúresedi
Sharaǵa Qazaqstan, Qytaı, Reseı, Qyrǵyzstan, Tájikstan, Ózbekstan, ShYU ALQK ókilderi, sondaı-aq 2017 jylǵy maýsymda ShYU-nyń Astana sammıtinde alǵash ret uıymnyń turaqty músheleri mártebesin alǵan Úndistan men Pákistan ókilderi qatysty.
QHR tóraǵalyq etken ShYU ALQQ Keńesiniń otyrysynda ShYU-ǵa múshe memleketterdiń lańkestikke, separatızmge, ekstremızmge qarsy kúrestegi yntymaqtastyǵy máseleleri jáne 2017 jylǵy Internet keńistigindegi «úsh zulym kúshterine» qarsy qımyl nátıjeleri talqylandy. Lańkestikke qatysy bar tulǵalardyń qozǵalys arnalaryn anyqtaý men onyń jolyn kesý, sonyń ishinde olardyń qarýly qaqtyǵystar júrip jatqan jerlerge barýy men odan ShYU-ǵa múshe memleketterdiń aýmaǵyna qaıtýyna tosqaýyl qoıý salasyndaǵy ózara birlesken áreketterdi tereńdetý týraly sheshim qabyldandy.
Otyrysta ShYU ALQQ Atqarý komıtetiniń jumys jospary, shekara qyzmetteri mamandar tobynyń qyzmet baǵdarlamasy, lańkestikke, separatızmge jáne ekstremızmge qarsy kúres jónindegi mamandar tobynyń jumys jospary bekitildy. Kezdesýge qatysýshylar ShYU ALQQ men Azııadaǵy ózara is-qımyl jáne senim sharalary keńesiniń (AÓSShK) Hatshylyǵy arasyndaǵy yntymaqtastyq týraly hattamanyń jobasyn, sondaı-aq ShYU ALQQ, TMD Lańkestikke qarsy ortalyǵy jáne Ujymdyq qaýipsizdik týraly kelisim uıymy Hatshylyǵy arasyndaǵy yntymaqtastyq memorandýmynyń jobasyn qabyldady.
ShYU ALQQ Keńesi otyrysynyń qatysýshylarymen QHR Memlekettik keńesiniń múshesi, qoǵamdyq qaýipsizdik mınıstri Go Shenkýn kezdesti. Ol Qytaıdyń ShYU-nyń ústimizdegi jylǵy maýsymda Astanada ótken sammıtinde QHR Tóraǵasy Sı Tszınpın men uıymǵa múshe memleketterdiń basqa lıderleri qol jetkizilgen mańyzdy konsensýsty belsendi qoldaıtynyn jetkizdi.
ShYU ALQQ Keńesiniń 2017 jylǵy qyrkúıekten 2018 jylǵy qyrkúıekke deıingi tóraǵalyǵy Qyrǵyzstanǵa ótti. ShYU ALQQ Keńesiniń kelesi 32-shi otyrysyn 2018 jylǵy sáýirde Ózbekstannyń Tashkent qalasynda ótkizý josparlandy.