ShYU Úkimet basshylarynyń otyrysy alǵash ret Úndistanda ótedi

BEIJІŃ. QazAqparat – Shanhaı yntymaqtastyǵy uıymyna (ShYU) múshe elderdiń Úkimet basshylarynyń otyrysy bıylǵy kúzde alǵash ret Úndistanda ótedi. Bul týraly búgin Nıý-Delıde ótken «Raısın dıalogy» halyqaralyq konferentsııasynda ShYU-nyń Bas hatshysy Vladımır Norov málim etti, dep habarlaıdy «QazAqparat» HAA menshikti tilshisi.

«Bıyl Úndistan ShYU-nyń mańyzdylyǵy jóninen ekinshi oryndaǵy – Úkimetter basshylary keńesine tóraǵalyq etedi. Onyń kelesi otyrysy Úndistanda kúzde ótedi», - dedi V.Norov.

Bul rette Bas hatshy Úkimetter basshylarynyń otyrysy aldynda mınıstrlikterdiń jáne sarapshylardyń kezdesýleri ótetinin málim etti. Sondaı-aq Úndistanda Ekonomıkalyq máseleler jónindegi saraptamalyq ortalyqtar konsortsıýmynyń birinshi otyrysyn uıymdastyrý josparlanǵan.

ShYU-ny qurý jónindegi deklaratsııaǵa 2001 jyldyń maýsymynda Shanhaıda alty memleket: Qazaqstan, Qyrǵyzstan, Qytaı, Reseı, Tájikstan jáne Ózbekstan qol qoıdy. 2017 jyly Qazaqstan astanasynda uıymǵa múshe memleket statýsyn Úndistan men Pákistan aldy.

Búginde ShYU-ǵa ený týraly (baqylaýshy/ dıalog boıynsha seriktes) usynys 12 elden tústi. Olar - Bangladesh, Saýd Arabııasy, Sırııa, Mysyr, Izraıl, Maldıv araldary, Ýkraına, Irak, Vetnam, Bahreın, Katar jáne BAÁ.