ShYU Taıaý Shyǵystaǵy shıelenisti dıplomatııalyq jolmen sheshýge shaqyrdy

BEIJІŃ. QazAqparat – Shanhaı yntymaqtastyq uıymy (ShYU) Taıaý Shyǵysta bolyp jatqan oqıǵalarǵa alańdaýshylyq bildirip, barlyq taraptardy shıelenistiń barynsha tıimdi saıası-dıplomatııalyq sheshimin tabýǵa shaqyrady. Bul týraly ShYU bas hatshysy Vladımır Norov Qytaı Halyq Respýblıkasyndaǵy Iran elshisi Keshavarz-Zademen kezdesý barysynda málim etti, dep habarlaıdy QazAqparat uıymnyń baspasóz qyzmetine silteme jasap.

«Óńirde bolyp jatqan oqıǵalarǵa alańdaýshylyq bildirip, barlyq taraptardy shıelenistiń tıimdi saıası-dıplomatııalyq sheshimin tabý jolynda barynsha ustamdylyq tanytýǵa, sondaı-aq Taıaý Shyǵystaǵy shıelenistiń odan ári ýshyǵýyna jol bermeýge shaqyramyz», - dep atap ótti ShYU bas hatshysy.

V. Norov ShYU halyqaralyq qatynastarda kúsh qoldanýdyń kez kelgen túrine qarsy ekenin jetkizip, BUU Jarǵysynyń negizgi qaǵıdaty egemendik pen aýmaqtyq tutastyqty qurmetteý ekenin atap ótti.

«ShYU BUU Jarǵysynyń maqsattary men qaǵıdattaryna berik ustaný, barlyq máselelerdi ózara konsýltatsııalar negizinde sheshý, ishki isterge aralaspaý, aýmaqtyq tutastyqty ózara qurmetteý, áskerı kúsh qoldanbaý nemese kúshpen qorqytpaý, birjaqty áskerı ústemdikten bas tartý jáne beıbitshilik pen qaýipsizdikti saqtaýǵa baǵyttalǵan halyqaralyq quqyqtyń jalpyǵa birdeı normalary negizinde sheshý qajettigin dáıekti túrde atap ótedi», - dep túıindedi ShYU bas hatshysy.

Avtory: Rýslan Súleımenov