ShYU sammıti «Úlken eýrazııalyq segizdik» retinde ótedi

ASTANA. QazAqparat - Shanhaı yntymaqtastyq uıymy óziniń «Úlken eýrazııalyq segizdik» formatyndaǵy birinshi sammıtine jan-jaqty daıyndyq júrgizip jatyr. Bul týraly búgin elordada ótip jatqan  Shanhaı yntymaqtastyq uıymy forýmynyń HІІІ otyrysynda ShYU Bas hatshysynyń orynbasary Aızada Sýbaqojaeva aıtty, dep habarlaıdy QazAqparat tilshisi.

«Qazirgi ýaqytta Shanhaı yntymaqtastyq uıymy óziniń «Úlken eýrazııalyq segizdik» formatyndaǵy birinshi sammıtine jan-jaqty daıyndyq júrgizip jatyr. Ózderińiz de biletindeı árbir sammıtte uıymnyń damý tarıhynyń jańa taraýlary jazylyp, naqty shynaıy ýaqytqa saı keletin jańa mindetter qoıylady.  Aldaǵy ýaqytta sammıttke ShYU elderiniń kóshbasshylary jańa formatta uıymdy odan ary damytýdyń birinshi kezekti mindetterin, sonymen qatar ózekti halyqaralyq jáne óńirlik problemalardy qarastyrady dep kútilýde», - dedi ol.

Aızada Sýbaqojaevanyń aıtýynsha, maýsym aıynda Qytaıdyń Tsındao qalasynda ótetin sammıt óńir men álemdegi beıbitshilik pen turaqtylyqty qoldaý, sonymen birge uıym aıasyndaǵy kópbeıindi ózara is-qımyldy tereńdetýge aıryqsha úles qosatyn bolady. Forým nátıjesinde naqty usynystar men usynymdar daıyndalady. 

Forým jumysyna Qytaı, Reseı, Úndistan, Pákistan, Iran, Aýǵanstan, Belarýs jáne Ortalyq Azııa memleketterinen kelgen delegattar qatysýda.

Aıta keterligi,  osy jyldyń maýsym aıynda Qytaıdyń Tsındao qalasynda ótetin ShYU sammıtine Elbasy Nursultan Nazarbaev qatysady dep kútilýde.