ShYU-nyń shtab-páterinde Astana sammıtiniń qorytyndysy shyǵaryldy
«Sammıt shynymen de tarıhı oqıǵa bolyp, uıym tarıhynda altyn árippen jazylyp qaldy», - dedi baspasóz máslıhatynyń ashylýynda ShYU-nyń Bas hatshysy.
Ol óziniń sózinde, ShYU-ǵa múshe elder basshylary keńesiniń otyrysy jáne jumys baǵdarlamasy sheńberindegi is-sharalar uıymnyń birligin pash etip, múshe elderdiń uzaq merzimdi yntymaqtastyqqa múddeli ekendigin aıqyn kórsetkendigin jetkizdi.
Sonymen qatar Qazaqstan uıymǵa tóraǵalyq etken jyl ishinde sammıtke jan-jaqty daıyndyq júrgizilgendigin jáne onyń protsesine Prezıdent Nursultan Nazarbaevtyń jeke ózi nazar aýdarǵandyǵyn atap aıtty.
«ShYU-ǵa múshe memleketter basshylary keńesiniń keńeıtilgen otyrysynda Úndistan men Pákistannyń resmı túrde uıymǵa múshe bolýyn tarıhı sát dep baǵalaý kerek», -dep túıdi Rashıd Alımov.
Sondaı-aq ShYU Bas hatshysy qaýipsizdik máselesine de erekshe nazar aýdaryp ótti. Bul másele ShYU qyzmetin aıqyndaıtyn baǵyttardyń biri bolyp qala beredi. Múshe-memleketter basshylarymen kelisilgen «Ekstremızmge qarsy is-qımyl konventsııasy» uıymǵa múshe elderdiń qaýip-qaterge ujymdyq jaýaby bolyp tabylady.
Bas hatshynyń sózine qaraǵanda, uıym elderi arasyndaǵy ekonomıkalyq jáne saýda-sattyq, sondaı-aq mádenı-gýmanıtarlyq baǵyttardaǵy qatynastar nyǵaıa túsken.
Astanadaǵy sammıtti qorytyndylaýǵa arnalǵan jıynda QR Tótenshe jáne ókiletti elshisi Qazaqstannyń syrtqy saıasattaǵy ornyn tilge tıek etip, uıymǵa múshe bolǵan Úndistan men Pákistan elderiniń elshilerin quttyqtap sóz sóıledi.
«Bir jyl ishinde QR Prezıdenti Nursultan Nazarbaev atap ótken Qazaqstannyń ShYU tóraǵalyǵyna basymdylyq retinde óńirlik qaýipsizdikti qamtamasyz etý, ekonomıkalyq qarym-qatynasty nyńaıtý, kólik-tranzıttik áleýetti keńeıtý jáne mádenı-gýmanıtarlyq yqpaldastyqty ilgeriletý máseleleri boıynsha jumystar júrgizildi», - dedi Sh.Nuryshev.