ShYU-nyń saýda-ekonomıkalyq yntymaqtastyq baǵdarlamasyn ózektendirý qajet - V.Pýtın

DÝShANBE. QazAqparat - Shanhaı yntymaqtastyq uıymynyń saýda-ekonomıkalyq yntymaqtastyq baǵdarlamasyn ózektendirý qajet. Búgin Dýshanbede ótip jatqan Shanhaı Yntymaqtastyq Uıymyna múshe memleketter basshylary keńesiniń keńeıtilgen quramdaǵy otyrysynda RF Prezıdenti Vladımır Pýtın osyndaı usynys jasady.

«Qurmetti áriptester! Álemdik ekonomıkadaǵy daǵdarysty qubylystyń áli de bolsyn eńserilmegendigin eske salǵym keledi. Al qazirgi shekteý men tosqaýyl syndy ártúrli saıası táýekelder isti odan ary qıyndata túsedi. Jahandyq iskerlik ahýalǵa tikeleı shyǵyn ákelip, halyqaralyq saýda men qarjy júıesindegi senim deńgeıin tómendetedi», - dedi RF Prezıdenti.

Osy rette V.Pýtın 2003 jyly qabyldanǵan ShYU-nyń saýda-ekonomıkalyq yntymaqtastyq baǵdarlamasyn jáne 2008 jylǵy ony júzege asyrý josparyn ózektendirý máselesine nazar aýdarýdy usyndy.

«Mundaı kooperatsııa úshin kóptegen tetikter bar - bul ShYU-nyń Іskerlik keńesi men Bankaralyq birlestigi, beıindi vedomstvolar basshylarynyń keńesteri», - dedi ol.